.:: İstanbul Kadı Sicilleri ::.


Anadolu Sadareti Mahkemesi 1 Numaralı Sicil (H. 1247-1250/ M. 1831-1834)
cilt: 93, sayfa: 136
Hüküm no: 128
Orijinal metin no: [25b-4]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Akhisar-ı Geyve kazası Kirasiye köyü camii hatipliğini usulsüz olarak üzerine alan Hasan b. Mehmed’in azledilerek yerine İbrahim b. Ahmed’in tayini

Sâdır olan fermân-ı âlîlerine imtisâlen işbu arzuhâl ve derkenâra nazar olundukda vilâyet-i Anadolu’da medîne-i Akhisar-ı Geyve kazâsına tâbi‘ Kirasiye karyesinde Çavuşzâde nâm sahibü’l-hayrın binâ eylediği câmi‘-i şerîfde yevmî nîm akçe vazîfe ile hatîb olan Ahmed b. ( ) bilâ-veled fevt oldukdan sonra oğlu olduğumdan bana tevcîh olunmak iktizâ ederken karye-i mezbûr sâkinlerinden Hasan b. Mehmed nâm kimesne beni ketm ve ihfâ ederek hilâf-ı vâki‘ ile bin iki yüz kırk dört senesi Cumâdelûlâ’da merkūma tevcîh olunup gadr olunduğundan bahisle sahib İbrahim b. Ahmed dâ‘îleri mezbûr Hasan b. Mehmed’in ref‘inden pederi müteveffâ-yı merkūmun mahlûlünden kendüye tevcîhinden yedine berat-ı şerîf-i âlîşân i‘tâ olunması[nı] işbu arzuhâl ile istid‘â eder [26a] fi’l-hakīka cihet-i mezkûre mezbûr Hasan b. Mehmed’in üzerine olduğu derkenârdan müstebân ve merkūm İbrahim bâliğ vâris-i? hizmet-i mezkûre ve müteveffâ-yı merkūmun sulbî oğlu olduğu kazâ-i mezbûr ahâlîsinden Der-aliyye’de müsâfiren sâkinler Şâkir b. Mehmed ve Abdullah b. Hüseyin nâm kimesnelerin alâ-tarîkı’ş-şehâde ihbâr eylediklerinden sonra sahib-i arzuhâl-i mezbûrun hitâbetine ehliyet ve liyâkati lede’l-imtihân zâhir ve bedîdâr olmağın bu sûretde cihet-i mezkûre merkūmun mahlûlünden ve merkūm Hasan b. Mehmed’in ref‘inden pederi müteveffânın mahlûlünden merkūm İbrahim b. Ahmed’e tevcîh [ve] yedine berat-ı şerîf-i âlîşân i‘tâsı husûsu re’y-i sâmîlerine menût idiği huzûr.