|
Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 136 Hüküm no: 129 Orijinal metin no: [26a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Otak kazası Ayvacık köyü camii hatipliğini usulsüz olarak üzerine alan Halil b. Mehmed’in azledilerek yerine Mehmed Emin b. Osman’ın tayini
Sâdır olan fermân-ı âlîlerine imtisâlen işbu arzuhâl ve derkenâra nazar olundukda vilâyet-i Anadolu’da Otak kazâsına tâbi‘ Ayvacık karyesinde vâki‘ câmi‘-i şerîfde yevmî nîm akçe vazîfe ile hitâbete cihetsiz mutasarrıf olan pederim Osman fevt oldukda mahlûlünden sulbî oğlu olmadığına binâen bana tevcîh iktizâ ederken mezkûrü’l-ism Halil b. Mehmed nâm kimesne beni ketm [ve] ihfâ ile hilâf-ı vâki‘ inhâsıyla iki yüz kırk beş senesi Zilka‘de’sinde bir-takrîb üzerine tevcîh etdirmekle mağdû[ri]yetinden bahisle sahib-i arzuhâl Mehmed Emin dâ‘îlerine cihet-i mezkûre merkūm Halil’in ref‘inden peder-i müteveffâ-yı merkūmun mahlûlünden kendüye tevcîh olunmasını fi’l-hakīka cihet-i mezkûre merkūm Halil b. Mehmed’in işbu arzuhâl ile istid‘â eder üzerinde olduğu derkenârdan müstebân ve merkūm Mehmed Emin müteveffâ-yı merkūm Osman’ın sulbî kebîr oğlu olduğu ve her vechile hitâbete ehil ve müstehık idiği kazâ-i mezbûr ahâlîsinden Der-aliyye’de müsâfiren sâkinler Halil b. İbrahim ve Mehmed b. Mustafa nâm kimesnelerin alâ-tarîkı’ş-şehâde haber vermeleriyle istihkākı zâhir ve nümâyân olmağın bu sûretde cihet-i mezkûre merkūm Halil b. Mehmed’in ref‘inden pederi müteveffâ-yı merkūmun mahlûlünden sahib-i arzuhâl merkūm Mehmed Emin b. Osman’a tevcîh ve yedine berat-ı şerîf-i âlîşân i‘tâsı husûsu re’y-i sâmîlerine menût idiği huzûr-ı âlîlerine i‘lâm olundu.
|