.:: İstanbul Kadı Sicilleri ::.


Anadolu Sadareti Mahkemesi 1 Numaralı Sicil (H. 1247-1250/ M. 1831-1834)
cilt: 93, sayfa: 137
Hüküm no: 130
Orijinal metin no: [26a-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Amasya’da Melek mescidi imamı Seyyid Ahmed’in vefatıyla yerine torunu Hafız Ali b. Mehmed’in tayini

Sâdır olan fermân-ı âlîlerine imtisâlen işbu arzuhâl ve derkenâra nazar olundukda medîne-i Amasya’da vâki‘ Melek mescid-i şerîfi[ni]n yevmî bir akçe vazîfe ile imâmet cihetine bâ-berât-ı âlî mutasarrıf olan büyük babası es-Seyyid Ahmed fevt oldukda müteveffâ-yı merkūmun sulbî oğlu es-Seyyid Mehmed’e tevcîh olunacak iken [kable’t]-tevcîhmerkūm es-Seyyid Mehmed fevt oldukda ecânibden Ahmed nâm kimesne bir-takrîb üzerine tevcîh ve berat ettirdikte kendüye gadr olundukdan bahisle merkūm Ahmed’in ref‘inden kendüye tevcîh ve berat-ı şerîf i‘tâ olunmasını sahib-i arzuhâl Hâfız Ali b. Mehmed dâ‘îleri istid‘â-yı inâyet eder, Der-aliyye’de müsâfiren sâkinler fi’l-hakīka merkūmun mahlûlünden kırk dört senesi Zilhicce’sinin günü es-Seyyid Hasan Halîfe[‘ye] tevcîh olundukda mezbûrun kasr-ı yedinden kırk yedi senesi Muharremi’l-harâmın yirmi yedinci günü târihiyle es-Seyyid Hâfız Mustafa b. Muharrem’e tevcîh olunup el-yevm merkūmun üzerinde derkenârdan müstebân ise de mefhûm-ı arzuhâl derkenâra mugāyir olmağla kazâ-i mezbûr ahâlîsinden Dersa‘âdet’de müsâfireten sâkinler Ali Çavuşoğlu Mehmed b. İbrahim ve Sâfîoğlu İbrahim b. Abdülkerim nâm kimesneler huzûr-ı şer‘a celb ve gereği gibi suâl olundukda müteveffâ-yı merkūm es-Seyyid Ahmed fevt sulbî oğlu Mehmed’e tevcîh olunacak iken kable’t-tevcîh mezbûr Mehmed dahi fevt oldukda sahib-i arzuhâl merkūm Hâfız Ali’ye tevcîh olunmak îcâb ederken derûn-ı derkenârda mezkûrü’l-ism es-Seyyid Abdullah hilâf-ı vâki‘ bir-takrîb tevcîh ettirdiği der-akab sılasından? Ahmed kasr-ı yed edip sahib-i arzuhâl Hâfız Ali’ye gadr olunduğu merkūm es-Seyyid Ahmed büyük babası olup sahib-i cihet idiği sahib-i arzuhâl Hâfız Ali cihet-i mezkûreye her vechile ehliyet ve istihkākını ve merkūmândan herbiri alâ-tarîkı’ş-şehâde haber vermeleriyle zâhir ve nümâyân olmağın bu sûretde cihet-i mezkûre es-Seyyid Mustafa’nın ref‘inden büyük babası es-Seyyid Ahmed’in mahlûlünden sahib-i arzuhâl Hâfız Ali’ye tevcîh olunmak husûsu re’y-i sâmîlerine menût idiği huzûr.