Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 87 Hüküm no: 63 Orijinal metin no: [12a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rüstem Paşa b. Abdürrahim’in Erzurum’da bulunan hamamını, kervansarayını, boyahanesini, bezirhanesini ve dükkânlarını Mustafa Kethüdâ b. Süleyman’a sattığı Düstûr-ı mükerrem müşîr-i müfahham nizâm-ı âlem hazret-i Rüstem Paşa b. Abdürrahim tarafından şirâ-i âtîye ve def‘-i semene Dergâh-ı âlî çavuşlarından fahrü’l-akrân Mehmed b. Ali ve zübdetü’l-emâsil Mehmed b. Pîrî nâm kimesneler şehâdetleriyle vekâleti sâbit olan fahrü’l-akrân ve zahrü’l-a‘yân Mustafa Kethüdâ b. Süleyman mahzarında fahrü’l-ümerâ’i’l-kirâm zahrü’l-küberâ’i’l-fihâm zü’l-kadri ve’l-ihtirâm el-muhtassu bi-inâyeti’l-meliki’l-mennân Mehmed Hân b. Şâhruh dâmet me‘âlîhi tarafından bey‘-i âtî ve kabz-ı semene Halil b. Mahmud ve Habib b. Cafer nâm kimesneler şehâdetleriyle vekâleti sâbit olan fahrü’l-akrân Turabî Abdullah es-Salah meclis-i şer‘-i şerîf-i Nebevî ve mahfil-i dîn-i Ahmedî’de bi’t-tav‘ ve’l-ihtiyâr ikrâr ve takrîr-i kelâm edip dedi ki müvekkîl-i mezbûrum mukaddemâ Erzurum beylerbeyisi iken nefs-i Erzurum’da bir hamam ve bir kârbânsaray ve bir boyahâne ve bir bezîrhâne ve iki yüz yetmiş yedi bâb dükkân yerlerin ve yirmi bâb değirmen ocakların alıp mezbûr hamamı ve on bâb değirmen ocakların ve yüz elli bâb dükkânı ta‘mîr edip bâkīsin dahî ta‘mîr etmek üzere iken harîk vâki‘ olup zikr olunan dekâkînden on beş bâb dükkân ve bir hamam kalmışdır. Hâliyâ sâhibine intimâ ile lede’l-ahâlî ma‘lûm olmağın tahdîdden müstağnî olup zikr olunan hamamı ve on beş bâb dükkânı ve sâir dekâkîn ve kârbânsaray (kervansaray) ve değirmen ocakları ve boyahâne ve bezîrhâne yerlerin cemî‘ tevâbi‘i ve levâhıkı ile mûmâ-ileyh Mustafa Kethüdâ’ya bin sikke tâmmü’l-vezn sahîhü’l-ayâr altına bey‘-i bât ile bey‘ ettim deyup ve meblağ-ı mezbûru müşârun-ileyh Mustafa Kethüdâ yedinden meclis-i şer‘de bi’t-tamâm ve’l-kemâl kabz ettikde mûmâ-ileyh Mustafa Kethüdâ dahî mukırr-ı mezbûru cemî‘ mâ zükirede vicâhen ve şifâhen tasdîk edip mâ-vaka‘a bi’t-taleb kayd olundu. Şuhûdü’l-hâl: Ahmed b. Süleyman, fahrü’l-akrân Mustafa b. Abdullah, fahrü’l-akrân Behram b. Abdullah.