.:: İstanbul Kadı Sicilleri ::.


Anadolu Sadareti Mahkemesi 1 Numaralı Sicil (H. 1247-1250/ M. 1831-1834)
cilt: 93, sayfa: 138
Hüküm no: 131
Orijinal metin no: [26a-3]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Ankara kazası haffaf ve dikici esnafı şeyhliğinin Seyyid Hafız Osman’dan alınarak Seyyid Mehmed Habib’e verilmesi

Sâdır olan fermân-ı âlîlerine imtisâlen medîne-i Ankara nâibi es-Seyyid Hasan Tahir Efendi dâ‘îlerinin mühr-i mutâbık i‘lâm ve derkenârına ba‘de’n-nazar medîne-i mezbûrda vâki‘ haffâf ve dikici esnâflarına usûl-ı kadîmlerimizin hilâfı hareket ve bazı tama‘-ı hâmma mübâşeretle esnâfeyn-i merkūmeyn dil-gîr etmiş olup ve esnâfından hoşnûd olmadıklarını cem‘-i gafîr ile huzûr-ı şer‘de ihbârlarından mâ‘adâ evvelâ Ankara mütesellimi sa‘âdetlü ağa bendeleri dahi esnâf-ı merkūmûndan hoşnûd olmadıklarından müstehıkk-ı mezkûre merkūm es-Seyyid Hâfız Osman’ın üzerinden [26b] ref‘ ve yerine içlerinden mücerrebü’l-etvâr bi-hüsn-i hâl olan dârende-i arzda mezkûrü’l-ism es-Seyyid Habib b. es-Seyyid Mehmed esnâfât-ı merkūmâta şeyh olunması arz-ı mezkûr meâlinden müstefâd olup fi’l-hakīka esnâf-ı mezbûrânın şeyhliği iki yüz otuz dört senesi Cemâziyelâhire’nin yirmi birinci günü târihiyle es-Seyyid Mehmed’in keff-i yedinden merkūm es-Seyyid Hâfız Osman b. es-Seyyid Mehmed’e tevcîh olunup üzerinde olduğu derkenârdan müstebân ve mezbûr es-Seyyid esnâf-ı merkūmânın muhtârı olup meşîhat-i mezkûrâna gelen kemâliyle idâre ve rü’yete kudreti olduğu ve mazmûn-ı arzı kazâ-i mezbûr esnâfından bu esnâda Der-aliyye’de Hüseyin b. İsmail ve Ahmed b. Ali nâm mevsûku’l-kelim alâ-tarîkı’ş-şehâde haber vermeleriyle zâhir ve âşikâr ise de bu makūle şeyhlik ve muhtârlarıyla olduklarından ber-mûceb-i arz es-Seyyid Hâfız Osman’ın ref‘inden es-Seyyid Mehmed Habib b. Mehmed’e tevcîh olunmak husûsu irâde-i seniyyeye menût idiği huzûr.