Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 85 Hüküm no: 85 Orijinal metin no: [18a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Kılkırmazoğlu İsmail Beşe’nin varislerinin kendilerine miras kalan bağı Nalband İbrahim Ağa’ya sattıkları Medîne-i Üsküdar’a muzâfe Adalar nâhiyesine tâbi‘ Kartal kasabasında sâkin iken bundan akdem vefât eden Kılkırmazoğlu demekle ma‘rûf İsmail Beşe b. İbrahim nâm kimesnenin verâseti verese-i münhasırasından zevcesi kendü nefsinden asıl ve sagīre kızı Nefise’nin bâ-hüccet-i şer‘iye vasîsi Zeyneb bt. ( ) Hatun tarafından ber-vech-i âtî ikrâra vekîl olduğu zat-ı mezbûreyi ârifân Ahmed Efendi b. Hüseyin ve Nalband Hüseyin Beşe b. Veli şehâdetleriyle sâbitü’l-vekâlesi zevci Veli Beşe b. İbrahim meclis-i şer‘-i hatîrde işbu bâ‘isü’l-vesîka Nalband İbrahim Ağa b. Hasan mahzarında bi’l-vekâle ikrâr ve takrîr-i kelâm edüp Abdurrahman tımâr[ı] toprağında Acıbadem nâm mevzi‘de vâki‘ etrâf-ı erba‘ası Nalbandoğlu Mehmed bağı ve Yakacıklı tarlası ve İslambollu Sarrâf zimmî bostanı ve es-Seyyid Abdülkadir bağı ve tarîk-i âm ile mahdûd tahmînen iki buçuk dönüm kürûmî mülk bir kıt‘a çavuş bağı müteveffâ-yı merkūmun mülkü ve ba‘de’l-vefât sümünü ma‘lûm zevcem mezbûreye seb‘a-i esmânı vasîsi olduğu sagīre-i mezbûreye isâbet ve intikāl etmişidi el-hâletü hâzihi bağ-ı mezkûrun hâsılı harcına vefâ etmemekle müvekkilem mezbûre kendü hissesini mezbûr İbrahim Ağa’ya bey‘ murâd etmekle sagīre-i mezbûrenin hissesi dahi ma‘an bey‘ olunup semeninin nemâsıyla infâk ve iksâ ve sâir bağlarının amele ücretini vermek hakkında enfa‘ ve evlâ olmağla bi’l-izni’ş-şer‘î tarafeynden îcâb ve kabûlü hâvî bey‘-i bâtt-ı sahîh-i şer‘î ile bağ-ı mahdûd-ı mezkûru asâleten ve vesâyeten semen-i misli olan altmış guruşa mezbûr İbrahim Ağa’ya bey‘ u teslîm ve temlîk eylediğinde ol dahi ber-vech-i muharrer iştirâ ve tesellüm ve temellük ve kabz u kabûl edüp semeni olan meblağ-ı mezkûr altmış guruşu yedinden asâleten ve vesâyeten ahz ü kabz eyledi ba‘de’l-yevm bağ-ı mahdûd-ı mezkûrda vechen mine’l-vücûh gerek müvekkilim mezbûrenin ve gerek sagīre-i mezbûre Nefise’nin kat‘â ve kātıbeten alâka ve medhalleri kalmayup müşterî-i mezbûr İbrahim Ağa’nın mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-Cemâziyelevvel li-sene semânîn ve mi’ete ve elf. Şuhûdü’l-hâl: Serdâr Mehmed Beşe, Hasan Usta, Hancı Süleyman Beşe, Nalband Halil, Osman Ağa, Nalband Zekeriya, Deli Mehmed b. Hasan, Hancı Derviş [b.] Halil Beşe. Fî 12 Şa‘bân sene [1]180