|
Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 139 Hüküm no: 133 Orijinal metin no: [26b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Arapgir? köyü cami imam ve hatibliğinin Ali b. Mehmed’den alınarak asıl sahibi Ali b. Mustafa’ya geri verilmesi
Sâdır olan fermân-ı âlîlerine imtisâlen işbu arz [ve der]kenâra nazar olundukda medîne-i Arapgir? kurâlarından Taylıalalı? karyesinde vâki‘ câmi‘-i şerîfde ber-vech-i hasbî hatîb olan Ali b. Mustafa Hasan mezkûr berat-ı âlîşân mutasarrıf iken yedin[de] olan berat-ı şerîf bi-kazâillâhi te‘âlâ ihrâk bi’n-nâr olduğundan diğer Ali b. Mehmed nâm kimesne hilâf-ı inhâ ile fevt oldu [deyü] ciheteyni bir-takrîb kendüye tevcîh ettirmiş ise de mezbûr Ali b. Mustafa hâl-i hayatda ve hatta sıhhatde olup imâmet ve hitâbet hizmetlerinde ale’d-devam mukīm olup ve diğer Ali b. Mehmed bir-takrîb tevcîh ettirdiği berat-ı şerîfi ketm ü ihfâ edip mezbûr Ali’ye gadr-i küllî olduğunu mahâllinde meclis-i şer‘-i şerîfde karye-i mezbûr ahâlîsinden cemm-i gafîr ile haber verdiklerini medîne-i mezbûre nâibi Ali Şâkir Efendi dâ‘îlerinin mühr-i mutâbık arzıyla inhâ eder, fi’l-hakīka ciheteyn-i mezkûreyn merkūm Ali b. Mustafa Hasan’ın bilâ-veled fevt olup mahlûlünden diğer oğlu Ali’[ye] bin iki yüz kırk bir senesi mâh-ı Recebi’l-ferdin on beşinci günü târihiyle tevcîh olduğu askerî rûznâmçesi derkenârından müstebân olmağın ve merkūm Ali b. Mustafa hâl-i hayatda olup ve hizmetinde kusûru olmadığı ve mazmûn-ı arzı kazâ-i mezbûr ahâlîsinden Der-aliyye’de müsâfiren sâkinler Mustafa Efendi b. Ali ve Ahmed Efendi b. Osman nâm kimesneler alâ-tarîkı’ş-şehâde haber vermeleriyle zâhir ve nümâyân olmağın bu sûretde sahib-i bâ‘is-i arz bilâ-veled fevt oldu deyü hilâf-ı inhâsından binâen mezbûr diğer Ali b. Mehmed’in ref‘inden merkūm Ali b. Mustafa’ya tevcîh ve yedine müceddeden berat-ı şerîf-i âlîşân sadaka ve ihsân buyurulmak iktizâ eylediği huzûr.
|