|
Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 140 Hüküm no: 134 Orijinal metin no: [27a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Kafirli nâhiyesi Almus köyündeki Fağfur Paşa vakıf mâlikânenin mutasarrıfı es-Seyyid el-Hâc Ali’nin vefatıyla oğullarının mâlikâne hissesi konusundaki anlaşmazlıkları
Sâdır olan fermân-ı âlîlerine imtisâlen işbu arz ve derkenâra nazar olundukda vilâyet-i Anadolu’da medîne-i Sivas’da ( ) sancağında Kafirli nâhiyesine tâbi‘ Almus karyesinde müteveffâ Nasruddin Fağfur Paşa nısf mâlikânesi vakfının nısf hisse mâlikâneye mutasarrıflığı evlâd-ı vâkıfdan es-Seyyid el-Hâc Ali ve nısf hissesi dahi yine merkūm es-Seyyid el-Hâc Ali’nin iki kıt‘a beratıyla üzerinde iken fevt oldukda sulbî sahîh oğulları es-Seyyid Mehmed ve es-Seyyid Mustafa ve es-Seyyid Ebûbekir ve es-Seyyid Osman nâm karındaşlar muvâcehelerinde bundan akdem Amasya nâibi es-Seyyid Mehmed Hasıl Efendi huzûrunda da‘vâ ve nizâ‘ …? beynimizi ıslâh ile ve müteveffâ-yı mezbûrun mutasarrıf olduğu nısf mâlikâne-i mezbûrenin nısf hissesi mahlûlünden mezbûr es-Seyyid Mustafa’ya ve nısf hissesi dahi müteveffâ-yı mezbûrun oğulları merkūmûn es-Seyyid Mehmed ve es-Seyyid Mustafa ve es-Seyyid Ebûbekir ve es-Seyyid Osman’a iştirâken tevcîh buyurulmak niyâzıyla mûmâ-ileyh başka başka yedlerine arz i‘tâ olunmuş ise de evlâd-ı merkūmûn mezbûr es-Seyyid Mustafa’ya olunan arzı ihfâ ve ketm ile yedinde olan arz ile nısf mâlikâne-i mezbûrenin cümlesini bir-takrîb kendülere iştirâken tevcîh ve berat ettirdiklerini müdde‘î merkūm es-Seyyid Mustafa huzûr-ı şer‘de evlâd-ı merkūmûn ile da‘vâ eyledikde evlâd-ı merkūmûn ber-vech-i muharrer müdde‘î-i mezbûr es-Seyyid Mustafa’nın bi’l-cümle kelimât-ı meşrûhasını tasdîk ettiklerini ve husûs-ı mezkûra vukūf-ı tâmmı olan kazâ-i mezbûr ahâlîsinden Der-aliyye’de müsâfiren sâkinler Davud Hoca ve Mustafa b. Abdullah nâm kimesnelerden etrâfıyla suâl olundukda işbu derûn-ı arz-ı mezkûrda muharrer olduğu üzere nısf mâlikâne-i mezbûr munassaf hisse müteveffâ-yı mezbûrun mâlları evlâd-ı merkū[mû]n es-Seyyid Mehmed ve es-Seyyid Mustafa ve es-Seyyid Ebûbekir ve es-Seyyid Osman nâm karındaşlar üzerlerinde ve nısf-ı âharı müteveffâ-yı mezbûr mahlûlünden ve evlâd-ı merkūmûn ref‘lerinden tevcîh olunmasına tarafeyn râzı oldukları müdde‘î-i mezbûr es-Seyyid Mustafa’ya herbiri alâ-tarîkı’ş-şehâde haber vermeleriyle zâhir ve nümâyân olmağın bu sûretde ber-mûceb-i arz evlâd-ı mezbûrdan üzerlerinde ibkā ve nısf hissesi müteveffâ-yı merkūm el-Hâc Ali’nin mahlûlünden evlâd-ı merkūmûn es-Seyyid Mehmed ve es-Seyyid Mustafa ve es-Seyyid Ebûbekir ve es-Seyyid Osman ref‘lerinden müdde‘î-i merkūm es-Seyyid Mustafa b. es-Seyyid Hasan dâ‘îlerine tevcîh ve yedine berat-ı şerîf-i âlîşân sadaka ve ihsân buyurulmak husûsu re’y-i sâmîlerine menût idiği huzûr-ı âlîlerine arz ve tebyîn ve i‘lâm olundu.
|