.:: İstanbul Kadı Sicilleri ::.


Anadolu Sadareti Mahkemesi 1 Numaralı Sicil (H. 1247-1250/ M. 1831-1834)
cilt: 93, sayfa: 141
Hüküm no: 135
Orijinal metin no: [27a-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Milas kazası Çolak köyü vakıf mâlikânesine kardeşleri Seyyid Ömer ve Seyyid Veyis ile mutasarrıf olan Seyyid Abdurrahman’ın hissesini kardeşlerinden ayırmak istemesi

Sâdır olan fermân-ı âlîlerine imtisâlen işbu arzuhâl ve derkenâra nazar olundukda vilâyet-i Anadolu’da Milas kazâsında Çolak nâm karyenin vakıf mâlikânesinin ber-vech-i meşrût mutasarrıf evlâd-ı vâkıfdan es-Seyyid Süleyman bundan akdem fevt olup bilâ-veled mahlûlünden karındaşları evlâd-ı vâkıfdan es-Seyyid Ömer ve es-Seyyid Veyis ve Abdurrahman’a ber-vech-i iştirâk tevcîh olundukda yedlerine bir kıt‘a berat-ı şerîf-i âlîşân [i‘tâ] buyurulmuş ise de sahib-i arzuhâl Abdurrahman’ın karındaşları müşterekleri kendi hisselerine kanâ‘at etmediklerinden mâ‘adâ merkūm Abdurrahman’ın ismi berat-ı âlîşânda mastûr değildir deyü gadr ettikleri[nden] bahisle sahib-i arzuhâl Abdurrahman kendi hissesini karındaşları merkūmânın hisselerinden tefrîk ve müstakillen kendi hissesine bir kıt‘a berat-ı şerîf-i âlîşân i‘tâ olunmasını işbu arzuhâl ile istid‘â eder, fi’l-hakīka nısf mâlikâne-i mezkûra ber-vech-i iştirâk merkūmûn es-Seyyid Ömer ve es-Seyyid Veyis ve Abdurrahman üzerlerinde olduğu Anadolu Muhâsebesi’nden muhrec derkenârdan müstebân ve sahib Abdurrahman karındaşlarıyla iştirâken hisse[dâr] olduğunu karye-i mezbûr ahâlîsinden Der-aliyye’de müsâfiren sâkinler Hasan b. Hacı Halil ve Abdullah b. Mehmed nâm kimesnelerin alâ-tarîkı’ş-şehâde haber vermeleriyle zâhir ve bedîdâr olmağın bu sûretde sahib Abdurrahman’ın hissesini karındaşları ve müşterekleri merkūmân es-Seyyid Ömer ve es-Seyyid Veyis’in hisselerinden tefrîk ve müstakillen merkūm Abdurrahman dâ‘îlerine bir kıt‘a berat-ı âlîşân inâyet ve ihsân buyurulmak iktizâ eylediği huzûr.