.:: İstanbul Kadı Sicilleri ::.


Anadolu Sadareti Mahkemesi 1 Numaralı Sicil (H. 1247-1250/ M. 1831-1834)
cilt: 93, sayfa: 141
Hüküm no: 136
Orijinal metin no: [27a-3]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Yenice-i Taraklı kazası Hark köyü camii hatibi el-Hâc Feyzullah b. Mehmed’in vefatıyla yerine oğlu Mehmed’in tayini

Sâdır olan fermân-ı âlîlerine imtisâlen işbu arz ve derkenâra nazar olundukda vilâyet-i Anadolu’da Yenice-i Taraklı kazâsına tâbi‘ Hark nâm karyede vâki‘ câmi‘-i şerîfde vazîfe-i mu‘ayyene ile hatîb olan el-Hâc Feyzullah b. Mehmed fevt olup yeri hâlî ve hizmet-i lâzımesi mu‘attal kaldığından bahisle bâ‘is-i arz müteveffâ-yı merkūmun sulbî sahîh oğlu erbâb-ı istihkākdan Mehmed b. Feyzullah dâ‘îlerine ber-kānûn-ı kadîm kazâ-i mezbûr nâibi Hâfız Mehmed Sâdık Efendi dâ‘îleri işbu mühr-i mutâbık arzıyla inhâ eder, fi’l-hakīka cihet-i mezkûre müteveffâ-yı merkūm el-Hâc Feyzullah b. Mehmed’in [27b] üzerinde olduğu derkenârdan müstebân ve merkūm Feyzullah b. Mehmed’in fevti vâki‘ derûn-ı arzda mezkûrü’l-ism Mehmed b. ( ) müteveffâ-yı merkūmun sulbî oğlu olduğu kazâ-i mezbûr ahâlîsinden Der-aliyye’de müsâfiren sâkinler talebe-i ulûmdan Mustafa b. Abdullah ve Hüseyin b. Ali Efendilerin alâ-tarîkı’ş-şehâde haber vermeleriyle zâhir ve bedîdâr olmağın bu sûretde cihet-i mezkûre müteveffâ-yı merkūmun mahlûlünden sulbî oğlu erbâb-ı istihkākdan Mehmed b. Mustafa’ya [Feyzullah’a] tevcîh ve yedlerine berat-ı şerîf-i âlîşân inâyet olmak iktizâ eylediği huzûr.