.:: İstanbul Kadı Sicilleri ::.


Anadolu Sadareti Mahkemesi 1 Numaralı Sicil (H. 1247-1250/ M. 1831-1834)
cilt: 93, sayfa: 142
Hüküm no: 137
Orijinal metin no: [27b-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Behisni kazasındaki Sevdim Bey Mescidi Vakfı tevliyetine Seyyid Hacı Mehmed ile diğer Seyyid Mehmed’in tayinleri

Sâdır olan fermân-ı âlîlerine imtisâlen işbu arz ve derkenâra nazar olundukda vilâyet-i Anadolu’da Behisni kazâsında Sûk-ı Sultânî’de Sevdim Bey mescid-i şerîfinin yevmî üç akçe vazîfe ile tevliyeti es-Seyyid Hacı Mehmed’in muvâcehesine kasaba-i mezbûr sâkinlerinden Uzun Ali ve neccâr Abdurrahman ve Kârib Bekir ve Şeyh Abdullah meclis-i şer‘-i şerîfe gelip şöyle da‘vâ eylediler ki bizler Sevdim Bey evlâdlarından olup mescid-i şerîf-i mezbûr kurbünde vâki‘ İplikçi Bedestânı Vakfı’nın gallâtı evlâdlarına kadîmü’l-eyyâmdan berü verilegelmiş olup mescid-i mezbûrun mütevellîsine ve mürtezikasına bir şey yokdur dedikde mütevellî-i merkūm es-Seyyid el-Hâc Mehmed cevâbında vakf-ı mezbûrun gılâlinden dört yüz guruş evlâd-ı vâkıfa meşrût bâkī gallâtda mescid-i mezbûrun mütevellîsine veregelip ol dahi mesârife mescid-i mezbûrun mürtezikalarına kadîmü’l-eyyâmdan verilegelmiş...? ve’l-hâsıl gallât-ı mezbûrun taksîmi husûsunda miyânelerinde münâza‘a vâki‘ olup ba‘de’t-terâfu‘ mütevellî-i merkūm yedinde zuhûr edip merkūmûnun men‘ [u] def‘ olunduğu[nu] müş‘ir mütevellî-i merkūm es-Seyyid Hacı Mehmed yedine bir kıt‘a sened-i şer‘iye verilmiş iken Uzun Ali mahzâ fesâdından şer‘-i şerîfe adem-i itâ‘atden nâşî Âsitâne-i aliyye’ye varıp mütevellî-i merkūm es-Seyyid Hacı Mehmed ile terâfu‘ olunup lâkin merkūm Hacı Mehmed’in isbâtları kazâ-i mezbûrda olmağla bu husûsun keşf ve sulhu için sâbık ma‘den emîni atûfetlü Osman Paşa hazretlerine bâ-emr-i âlî ihâle olunduğundan merkūmân huzûr-ı şer‘-i şerîfde terâfu‘ olup mütevellî-i merkūm es-Seyyid el-Hâc Mehmed’in evlâd-ı vâkıfdan olduğu Uzun Ali ve sâirleri dahi ikrâr edip ba‘dehû Se[v]dim Bey evlâdlarından hısn-ı Mansur Dede’ye mansûbe? hazretleri dahi münâsib görüp ber-vech-i iştirâk tevcîh olunmasını kazâ-i mezbûr nâibi es-Seyyid Mehmed Şerif dâ‘îlerinin mühr-i mutâbık i‘lâmından nümâyân olup isti‘lâmı hâvî sâdır olan fermân-ı âlîşâna cevâb olarak fi’l-hakīka tevliyet-i mezbûr merkūm es-Seyyid el-Hâc Mehmed’in olduğu derkenârdan müstebân olmağın bu sûretde es-sulhü seyyidü’l-ahkâm mısdâkınca tevliyet-i mezbûrun nısf hissesi hâlâ mütevellî-i merkūm Hacı es-Seyyid Mehmed üzerinde ibkā ve nısf-ı âhar ref‘inden merkūm diğer es-Seyyid Mehmed’e ber-mûceb-i arz tevcîh ve yedine berat-ı şerîf-i âlîşân i‘tâ ve inâyet ve ihsân buyurulmak iktizâ eylediği huzûr.