Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 125 Hüküm no: 155 Orijinal metin no: [24a-4, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kefe’de öldürülen ve muhallefâtı Beytülmâl tarafından zabt edilen Hoca Ramazan b. Mansûr’un vârislerinin karısı Cansever ve oğlu Mehmed olduğu Mehmed b. Abdülkerim ve Hızır b. Mustafa ve Yakub b. Yusuf ve Ali b. Hasan nâm kimseler emâcid-i mükerremîn defterdârlar nezdindeki dîvân-ı âlîye gelip mahmiye-i Kostantıniyye’de vâki‘ Beytülmâl-i hâs emîni Hızır Çelebi b. İlyas ve kâtibi Mehmed Çelebi b. Nasuh mahzarlarında, kendi nefsinden asâleten, Mehmed b. Hoca Ramazan nâm sagīr kıbelinden vesâyeti şuhûd-ı mezkûrenin şehâdetleri ile sâbit olduktan sonra vesâyeten, mahrûse-i Kefe mahallâtından hatuniye mahallesinde sâkine olan Cansever bt. Abdullah’tan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet eylediler ki, müdde‘iye-i mezkûre Cansever ve sagīr-i mezbûr Mehmed, bundan akdem hâric-i kal‘a-i Kefe’de maktûlen fevt olan ve muhallefâtı Beytülmâl-i mezbûr tarafından zabt edilen Hoca Ramazan b. Mansûr’un vârisleridir. Şu cihetle ki, mezkûre Cansever, müteveffâ-yı mesfûrun öldüğünde taht-ı nikâhında bulunduğu zevcesidir. Mezbûr Mehmed de müteveffâ-yı merkūmun sulbî oğludur. İkisinden gayrı vârisi ma‘lûmumuz değildir. Şehâdeten şer‘iyyeten makbûleten ba‘de’t-ta‘dîli’ş-şer‘î ve’t-tezkiyeti’ş-şer‘iyye, hâkim-i muvakkı‘ a‘lâhu mûcebince hükmetti. Cerâ zâlike ve hurrire fî 15 Muharremi’l-harâm li-sene 965 Şuhûdü’l-hâl: el-Hâc Ahmed b. Mahmud el-Kefevî ve Süleyman b. Murad ve Bahşı b. Ali ve Timur b. Mahmud