.:: İstanbul Kadı Sicilleri ::.


Anadolu Sadareti Mahkemesi 1 Numaralı Sicil (H. 1247-1250/ M. 1831-1834)
cilt: 93, sayfa: 143
Hüküm no: 139
Orijinal metin no: [27b-3]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Kırluhisar’daki Sultan Mehmed Han Camii hitabeti yarı hissesinin Seyyid Halil Zihni’den alınarak Seyyid Mehmed Feyzi’ye verilmesi

Sâdır olan fermân-ı âlîlerine imtisâlen işbu arz ve derkenâra nazar olundukda Karahisar-ı Şarkī sancağında Kırluhisar’da vâki‘ cennet-mekân Sultân Mehmed Han Câmi‘-i şerîfi Vakfı’ndan almak üzere vazîfe-i mu‘ayyene ile hitâbet cihetine bâ-berât-ı şerîf-i âlîşân mutasarrıfları es-Seyyid Halil Zihni ve es-Seyyid Mahmud Nuri nâm müştereklerden merkūm es-Seyyid Halil Zihni’nin hitâbet-i mezkûreye ehl ü istihkākı olmayıp hizmet-i lâzımesi mu‘attal kaldığından bahisle merkūm es-Seyyid Halil Zihni’nin hitâbet hissesi nısfı ref‘inden derûn-ı arzuhâlde mezkûrü’l-ism Mehmed Feyzi üzerine tevcîh olunmasını kazâ-i mezbûr nâibi Ali Rıza Efendi dâ‘îlerinin mühr-i mutâbık arzıyla inhâ eder, fi’l-hakīka hitâbet-i mezkûre vazîfe-i mu‘ayyene ile merkūmân es-Seyyid Halil Zihni ve es-Seyyid Mahmud Nuri nâm müştereklerin üzerlerinde olduğu derkenârdan müstebân ve merkūm es-Seyyid Halil Zihni’nin nâ-ehil olduğu ve müştereki es-Seyyid Mahmud Nuri’nin her vechile erbâb-ı istihkākdan [28a] ise de lâkin zâtı kazâ-i mezbûrda olmayıp şuhûr-ı selâsede meşîhat etmek için altı ayı sû-güzâr? edip müşterek olan merkūm es-Seyyid Halil Zihni’nin hissesine rağbet etmediği ve dârende-i arz es-Seyyid Mehmed Feyzi Halîfe’nin erbâb-ı istihkākdan idiği kazâ-i mezbûr ahâlîsinden Der-aliyye’de müsâfiren sâkinler ve erbâb-ı vukūfdan Küçük Ali, el-Hâc Mustafa b. Ali ve Hacıoğlu Abdurrahman b. Ali ve sâir mevsûku’l-kelim kimesnelerden alâ-tarîkı’ş-şehâde haber vermeleriyle hitâbet-i mezbûrun nısf hisse merkūm es-Seyyid Halil Zihni’nin ref‘inden müştereki erbâb-ı istihkākdan es-Seyyid Mahmud Nuri’ye tevcîh yâhûd mezbûr Nuri’nin ref‘inden, [adem-i] rağbetinden? ber-mûceb-i arz erbâb-ı istihkākdan mezbûr es-Seyyid Mehmed Feyzi dâ‘îlerine tevcîhi husûsu re’y-i sâmîlerine menût idiği huzûr.

Fî 15 L sene [12]49