.:: İstanbul Kadı Sicilleri ::.


Anadolu Sadareti Mahkemesi 1 Numaralı Sicil (H. 1247-1250/ M. 1831-1834)
cilt: 93, sayfa: 144
Hüküm no: 140
Orijinal metin no: [28a-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Yomra kazası Çivana köyü camii imam ve hatipliği görevinin İsmail b. Hüseyin’den alınarak asıl sahibi Ahmed b. İsmail’e verilmesi

Sâdır olan fermân-ı âlîlerine imtisâlen Akçaâbad ma‘a Yomra kazâsı [nâibi] es-Seyyid İbrahim Efendi’nin mühr-i mutâbık arzıyla ve hâmişinde mastûr derkenârlara nazar olundukda kazâ-i mezbûra tâbi‘ Çivana karyesinde vâki‘ câmi‘-i şerîfin ber-vech-i hasbî imâmet ve hitâbet cihetlerine bundan akdemce mutasarrıf olan Ahmed b. İsmail’in hizmet-i mezkûrelerinde kusûru yoğiken ecânibden İsmail b. Hüseyin nâm kimesne hilâf-ı inhâ bir-takrîb bundan akdem Trabzon nâibi Mehmed Efendi’den aldığı bir kıt‘a arzı mûcebince ve mûceb-i arz kendüye tevcîh ve üzerine berat ettirmiş ise de tevcîhi târihinden berü câmi‘-i şerîfde edâ-i salât olmayıp kendisi tarîk-ı ticâretden me’lûf ve diyâr-ı âharda olduğundan merkūm İsmail’in ref‘inden ber-tevcîh-i esbak-ı mezbûr ile İsmail Halîfe’ye tevcîh olunması meâl-i arz ve derkenârdan müstebân ve ciheteyn-i mezkûreteyn mezbûr Ahmed b. İsmail’in üzerinde iken zuhûr-ı terk-i diyâr yirmi seneden mütecâviz Der-aliyye’de tavattun etmekle ref‘inden Trabzon nâibi es-Seyyid el-Hâc Hasan Efendi’nin arzıyla kırk bir senesi Cemâziyelâhir’inde merkūm Molla İsmail’e tevcîh olunup hasmı zuhûrunda terâfu‘-i şer‘-i şerîf olunmadıkça ref‘ine tesâddî olunmamak üzere kaydı bâlâsına dahi bâ-emr-i âlî kırk dokuz senesi Rebî‘ülûlâ’nın on dördüncü günü müverrah şerh verildiği askerî rûznâmçesinden ve derkenârlardan müstebân ve mezbûr Ahmed’in ciheteyn-i mezkûreteyni edâ ve hizmetde kusûru olmadığı kazâ-i mezbûr ahâlîsinden Der-aliyye’de müsâfiren sâkinler Mehmed b. Feyzullah ve Mehmed b. Osman nâm kimesnelerin alâ-tarîkı’ş-şehâde haber vermeleriyle ciheteyn-i mezkûreteyn merkūm İsmail’in ref‘inden sahib-i evveli mezbûr Ahmed’e yâhûd ber-mûceb-i derkenâr kaydı bâlâsına şerh verildiği üzere terâfu‘-i şer‘-i şerîfe havâlesi husûsu irâde-i seniyyeye menût idiği huzûr.

Fî 11 L sene [12]49