|
Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 145 Hüküm no: 141 Orijinal metin no: [28a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Milas kazası Yuvalı köyü mâlikânesi hissedarlığına mutasarrıf Seyyid Ahmed ve Seyyid Ali kardeşlerin kaybettikleri beratlarının yenilenmesi
Sâdır olan fermân-ı âlîlerine imtisâlen işbu arz ve derkenâra nazar olundukda Milas kazâsında Yuvalı karyesinde Eslem Hatun evlâdının karye-i mezbûre mâlikânesinde evlâdiyet ve meşrûtiyet üzere hissedârlığına bâ-berât-ı şerîf-i âlîşân mutasarrıfları es-Seyyid Ahmed ve es-Seyyid Ali nâm karındaşların yedinde olan berat-ı şerîfi bi-kazâillâhi te‘âlâ zâyi‘ olmağla zâyi‘inden merkūmâna müceddeden bir kıt‘a berat-ı şerîf-i âlîşân ihsân kılınmak bâbında kazâ-i mezbûr nâibi es-Seyyid Muharrem Efendi dâ‘îlerinin mühr-i mutâbık arzıyla inhâ eder, fi’l-hakīka evlâdiyet ve meşrûtiyet üzere mâlikâne-i mezbûr hissedârlığı merkūmân es-Seyyid Ahmed ve es-Seyyid Ali ibney Abdullah’ın üzerlerinde olduğu derkenârdan müstebân ve merkūmânın sahib-i berat idikleri kazâ-i mezbûr ahâlîsinden Der-aliyye’de müsâfiren sâkinler Osman Çavuşoğlu Hacı Osman b. Hüseyin ve Sarıalioğlu es-Seyyid Rıdvan b. es-Seyyid İbrahim nâm kimesnelerin alâ-tarîkı’ş-şehâde haber vermeleriyle ber-mûceb-i derkenâr zâyi‘inden merkūmân es-Seyyid Ahmed ve es-Seyyid Ali ibney Abdullah nâm karındaşlara müceddeden berat-ı şerîf-i âlîşân sadaka ve ihsân buyurulmak iktizâ eylediği huzûr-ı âlîlerine arz u i‘lâm olundu. Bâkī emr u fermân hazret-i men-lehu’l-emrindir.
Fî 11 Ra sene [12]49
|