Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 86 Hüküm no: 86 Orijinal metin no: [18a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar Muhzırbaşılığı görevinden kendi rızasıyla ayrılan Hüseyin Bevvab’ın yerine Ahmed v. Abdullah’ın tayin olunduğu Tuğrâ-yı garrâyla berat-ı şerîf kayd şüd. Nişân-ı şerîf-i âlîşân oldur ki Kapıcıoğullarından râfi‘-i tevkī‘-i refî‘ü’ş-şân-ı Hakānî el-Hâc Ahmed v. Abdullah Bevvâb Südde-i sa‘âdetime gelüp Üsküdar kazâsının muhzırbaşılık ve ihtisâbından mâ‘adâ Üsküdar nevâhîsinden İstavroz ve Kuzguncuk ve Pendik ve Darıca ve Tuzla ve Kartal ve Maldepe ve Çenga[l] (Çengel) ve Adalar ve Karye-i kādı ve tevâbi‘i ve ihzâriyesi kapıcıoğullarına mahsûs ve sekiz bin beş yüz akçe bir hisse olmak üzere mutasarrıf olan Hüseyin Bevvâb yedinde olan beratını verüp zikr olunan ihtisâb ve ihzâriyeden hüsn-i rızâsıyla ferâğ ve kasr-ı yed edüp yeri hâlî ve hizmet-i lâzimesi mu‘attal ve bu erbâb-ı istihkākdan ve her vechile mahâll ü müstahık olmağla sâlifü’z-zikr nevâhîlerin ihtisâb ve ihzâriyesi mezkûr Hüseyin Bevvâb’ın kasr-ı yedinden kendüye tevcîh olunup yedine berat-ı şerîfim verilmek içün iftihârü’l-emâcid ve’l-ekârim bi’l-fi‘il Başkapıcı Osman -dâme mecdühû- tarafından memhûr temessük verilmeye inâyet ricâ etmeğin mûcebince tevcîh edüp işbu berat-ı sa‘âdet-âyât ve behçet-garrâyı verdim ve buyurdum ki ba‘de’l-yevm mezkûr el-Hâc Ahmed v. Abdullah Bevvâb varup Üsküdar kazâsının muhzırbaşılık ve ihtisâbından mâ‘adâ Üsküdar nevâhîsinin İstavroz ve Kuzguncuk ve Pendik ve Darıca ve Tuzla ve Kartal ve Maldepe ve Çengel ve Adalar ve Karye-i kādı ve tevâbi‘i ve ihtisâb ve ihzâriyesine yalnız sekiz bin beş yüz akçe bir hisse olmak üzere fâriğ-i merkūm Hüseyin Bevvâb’ın yerine mutasarrıf olup hizmet-i lâzimesin bî-kusûr mer‘î ve müeddî kıldıkdan sonra ol bâbda efrâd-ı âferînden hiç ahad mâni‘ ve dâfi‘ [ve] müdâfi‘ olmayup dahl ü ta‘arruz kılmayalar şöyle bileler alâmet-i şerîfe i‘timâd kılalar. Tahrîren fi’l-yevmi’l-hâmis ve’l-ışrîn min-Saferi’l-hayr li-sene semânîn ve mi’ete ve elf. Be-makām-ı İslambol el-Mahrûse.