Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 150 Hüküm no: 150 Orijinal metin no: [29b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arniye Lazkiye kazası Kadı köyü camii hatibliğine Mehmed Ârif b. Hüseyin’in tayini Sâdır olan fermân-ı âlîlerine imtisâlen işbu arz ve derkenâra nazar olundukda vilâyet-i Anadolu’da Arniye Lazkiye kazâsına tâbi‘ Kadı nâm karyede el-Hâc Mehmed Niyaz ve Hacı Hüseyin’in ta‘mîr ve termîm eylediği câmi‘-i şerîfde yevmî bir akçe vazîfe ile hitâbet cihetine bâ-berât-ı âlî mutasarrıf olan pederi Hüseyin b. Ahmed nâm [kimesne] fevt olup mahlûlünden karye-i mezbûre sükkânından Hazım Halîfe b. Ahmed’e tevcîh olup pederi nân pâresini merkūm Ahmed b. Hazım üzerinden ref‘ ve kendüye tevcîh olunmasını sahib-i arzuhâl müteveffâ-yı merkūmun oğlu Mehmed Ârif b. Hüseyin dâ‘îleri işbu arzuhâl ile istid‘â eder, fi’l-hakīka hitâbet-i mezkûre müteveffâ-yı merkūmun mahlûlünden işbu bin iki yüz kırk dokuz senesi Rebî‘ülevvel’de kazâ-i mezbûr nâibi es-Seyyid Mustafa Efendi’nin arzıyla merkūm Hazım b. Ahmed’e tevcîh olunup el-yevm merkūm Hazım Halîfe b. Mehmed’in üzerinde olduğu derkenârdan müstebân olup ve husûs-ı mezkûra vukūf-ı tâm olup kazâ-i mezbûr ahâlîsinden Der-aliyye’de müsâfireten sâkinler huzûr-ı şer‘-i şerîf-i envere celb olunup Mehmed b. Süleyman ve Mustafa b. Ahmed nâm kimesnelere suâl olundukda sahib-i arzuhâl Mehmed Ârif babası fevtinde oğlu sagīr bulunup müteveffâ-yı merkūmun sulbî sahîh oğlu olup şimdi erbâb-ı istihkākdan olup her vechile lâyık ve müstehık olduğu merkūmândan zâhir ve nümâyân olmağın bu sûretde hitâbet-i mezkûre vazîfe-i merkūmesiyle babası mahlûlünden ve Hazım Halîfe’nin ref‘inden sahib-i arzuhâl Mehmed Ârif dâ‘îlerine tevcîh ve yedine berat-ı şerîf-i âlîşân inâyet buyurulmak husûsu re’y-i sâmîlerine menût idiği huzûr.