Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 153 Hüküm no: 156 Orijinal metin no: [30b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sivas’daki Darürraha Zaviyesi Vakfı reis-i tevliyet hissedarı Seyyid İbrahim b. Süleyman’ın vefatıyla yerine Seyyid Osman’ın tayini Sâdır olan fermân-ı âlîlerine imtisâlen işbu arz ve derkenârlara nazar olundukda medîne-i Sivas’da vâki‘ Darü’r-raha Zâviyesi Vakfı’nın ber-vech-i meşrûta re’îs-i tevliyetin hissedârlığına mutasarrıf olan Seyyid İbrahim b. Süleyman fevt olup mahlûlünden batn-ı sânîde olan sulbî oğlu es-Seyyid Abdülvahhab vâkıfın batn-ı evvelinde ekber ve erşed evlâd-ı vâkıfdanım diyerek hilâf-ı şart-ı vâkıf bir-takrîb re’îs-i tevliyet-i mezkûreyi üzerine tevcîh ve berat ettirtip ancak vakf-ı mezbûrun gallesi nâzır ve evlâd-ı vâkıf ve sâir ehl-i mürtezika ile beher sene rü’yet-i muhâsebe olunması mu‘tâd-ı kadîm iken merkūm Seyyid Abdülvahhab rü’yet-i muhâsebeden ibâ ve imtinâ‘ ve evlâd-ı vâkıf ve sâir ehl-i mürtezikaya gadr-i küllî mûcib hâlâta tesâddî eylediği ve merkūm es-Seyyid Abdülvahhab mevcûd olan evlâd-ı evlâd-ı evlâd-ı vâkıfın derecede muahhar olup derûn-ı arzda ism-i mezkûr es-Seyyid Osman b. Mehmed derecede mukaddem ve ekber ve erşed ve aslah evlâd-ı vâkıfdan olduğu medîne-i mezbûre nâibi Müftizâde es-Seyyid Ahmed Efendi’nin mühr-i mutâbık arz-ı mezkûrundan müstebân ve re’îs-i tevliyet-i mezkûre vazîfe-i mu‘ayyenesiyle müteveffâ es-Seyyid Süleyman b. es-Seyyid Abdurrahman’ın mahlûlünden batn-ı evvelde ve şart-ı vâkıf üzere nevbet-i tasarruf-ı tevliyet kendinin ise kaydıyla 1234 senesi S 28 târihiyle sulbî oğlu es-Seyyid İbrahim’e tevcîh olunup ba‘dehû merkūm es-Seyyid İbrahim dahi fevt olmağla mahlûlünden 1243 senesi L 12 günü târihiyle sulbî oğlu es-Seyyid Abdülvahhab’a tevcîh olunup el-yevm bâ-berat üzerinde olduğu derkenârdan nümâyân ve vakf-ı mezbûrun biri 721 senesi L 2 günü ve biri 787 senesi R 11 günü târihiyle müverrah iki kıt‘a vakfiye sûretleri 1196 senesi Ca 9 günü bâ-fermân Anadolu Muhâsebesi Kalemi’ne kaydolunup bu def‘a kaydı ihrâc olunan Arabiyyü’l-ibâre sûret-i vakfiyelerden vakfiye-i [ûlâda] evlâd-ı evlâd-ı evlâd-ı vâkıfın eslah ve erşedine ve vakfiye-i sâniyede utekā evlâdının batn ba‘de batnin kaydıyla muharrer ise de mazmûnu müsbet olmayan vakfiye ile amel câiz olmayıp el-kadîmü yütreku alâ-kıdemihî mısdâkınca te‘âmül-i kadîm ne vechile ise ol vechile amel olunmak şer‘an lâzım gelip bu sûretde ber-mûceb-i amel-i kadîm derecede mukaddem olup ekber ve erşed ve eslah olmağla müstehıkk-ı nevbet-i tasarruf-ı re’îs-i tevliyet idiği felân ve felân ihbârlarıyla zâhir olan merkūm es-Seyyid Osman’a ber-mûceb-i arz-ı mezkûr re’îs-i tevliyet-i mezkûre derecede muahhar olan mezbûr es-Seyyid Abdülvahhab’ın ref‘inden tevcîh ve yedine berat-ı şerîf-i âlîşân i‘tâsı husûsu re’y-i âlîlerine menût idiği huzûr-ı âlîlerine i‘lâm olundu. Fî Ca sene [12]49