Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 154 Hüküm no: 157 Orijinal metin no: [30b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tosya’daki Abdurrahman Paşa Camii müezzinliğinin Hafız Mehmed’in üzerinde olduğu Sâdır olan fermân-ı âlîlerine imtisâlen arzuhâl ve derkenâra ba‘de’n-nazar medîne-i Tosya’da vâki‘ merhûm Abdurrahman Paşa Câmi‘-i şerîf Vakfı’ndan almak üzere yevmî iki akçe vazîfe ile câmi‘-i şerîf-i mezkûr müezzinliği ciheti sahib-i arzuhâl merkūm Hâfız Mehmed b. Mehmed’in üzerinde olduğu Anadolu Muhâsebesi’nden muhrec ve yevmî bir akçe vazîfe ile vakt-i mağrib ve işâ ve subhda müezzinlik ciheti tedâvül-i ebedî ile el-yevm derûn-ı arzuhâlde ismi mezkûr es-Seyyid Mehmed b. Mahmud’un üzerinde olduğu askerî rûznâmçesinden muhrec derkenârlardan müstebân ve vakf-ı mezbûrun 982 târihiyle müverrah Anadolu Muhâsebesi’nde mukayyed Arabiyyü’l-ibâre vakfiyesinde vakf-ı mezkûr câmi‘inde yevm-i Cuma ve evkāt-ı hamse müezzinlikleri başka başka zikr ve tasrîh olunmuş olup vakt-i mağrib ve işâ ve subh müezzinliğine dâir nesne tahrîr olunmadığı kuyûddan nümâyân ve vakt-i mağrib ve işâ ve subh müezzinliği cihetinin kaydı terkīn olunmasını sahib-i arzuhâl merkūm işbu arzuhâl ile istid‘â etmiş ise de 1164 târihinden berü müezzinlik-i mezkûr ciheti bâ-berât âhara tevcîh oldukları mutasarrıfı merkūm es-Seyyid Mehmed’in bâ-berât uhdesinde olduğundan bilâ-mürâfa‘a merkūm es-Seyyid Mehmed’in gıyâbından üzerinden ref‘ ve kaydının terkīni husûsu hilâf-ı şer‘-i şerîf olduğundan husûs-ı mezkûru mahâllinde vakf-ı mezbûr mütevellîsi hazır olduğu hâlde merkūm es-Seyyid Mehmed huzûr-ı şer‘a celb ve istintâk olunarak isti‘lâm olunmak iktizâ eylediği huzûr-ı âlîlerine. Fî-gurreti C sene [12]49