Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 155 Hüküm no: 158 Orijinal metin no: [30b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Divriği kazası Hammam-ı Süfla mahallesindeki Osman Mescidi müezzin ve ferraşlık cihetlerine mutasarrıf Mehmed Hamdi b. Hüseyin’in görevlerini Hafız Ömer’e devretmesi Sâdır olan fermân-ı âlîlerine imtisâlen işbu istid‘â ve derkenâra nazar olundukda vilâyet-i Anadolu’da Divriği kazâsında Hammâm-ı Süflâ mahallesinde vâki‘ Osman Mescid-i şerîfi Vakfı’ndan almak üzere beş sehmden bir sehm ile müezzin vekîli? ve ferrâş cihetlerine mutasarrıf olan Mehmed Hamdi b. Hüseyin müderrisîn-i kirâmdan olup edâ-i hizmet edemeyeceğinden mutasarrıf olduğu ciheti kendi hüsn-i rızâsıyla sahib-i arzuhâl Hâfız Ömer b. Mehmed’e ferâğat ve kasr-ı yed edip yedinde olan berat-ı şerîfi huzûr-ı şer‘de teslîm etmeğin fi’l-hakīka ciheteyn-i mezbûreteyn Mehmed Hamdi b. Hüseyin üzerinde olduğu derkenârdan müstebân ve merkūm Mehmed Hamdi’nin sahib-i berat idiğini ve sahib-i arzuhâl mezbûr Hâfız Ömer b. Mehmed’in vücûhla liyâkat ve istihkākı bî-garaz mevsûku’l-kelim müderrisîn-i kirâmdan Mehmed Selim Sırrı Efendi ve Mehmed b. Abdullah nâm kimesnelerin alâ-tarîkı’ş-şehâde ihbâr etmeleriyle zâ[hir ve] müstehık ve bedîdâr olmağın bu sûretde fâriğ-i merkūmun kasr-ı yedinden sahib-i arzuhâl mezbûr Hâfız Ömer b. Mehmed’e tevcîh ve atîk beratı kaleminde hıfz olunarak yedine müceddeden berat-ı şerîf-i âlîşân inâyet ve ihsân buyurulmak iktizâ eylediği huzûr-ı âlîlerine i‘lâm olundu. [Fî] 7 C sene [12]49