Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 156 Hüküm no: 159 Orijinal metin no: [30b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Giresun kazasındaki Hacı Hüseyin Camii Vakfı mütevellisi Seyyid Osman’ın vefatıyla tevliyetin oğulları Seyyid Mehmed ve Seyyid Osman’a tevcihi Sâdır olan fermân-ı âlîlerine imtisâlen işbu arz [ve] derkenâra nazar olundukda Anadolu’da medîne-i Giresun kazâsında vâki‘ Hacı Hüseyin nâm sahibü’l-hayrın binâ eylediği câmi‘-i şerîf vakfının evlâdiyet ve meşrûtiyet üzere yevmî iki akçe vazîfe ile mütevellîsi olan es-Seyyid Osman fevt olup tevliyet-i mezkûre vazîfe-i mersûmesiyle sulbî oğulları derûn-ı arzda isimleri mezkûr es-Seyyid Mehmed ve es-Seyyid Osman’a ber-vech-i iştirâk tevcîhi iktizâ eder iken merkūm es-Seyyid Mehmed karındaşı mezbûr es-Seyyid Osman’ı ketm ve ihfâ ederek bir-takrîb kazâ-i mezbûr nâib-i esbak es-Seyyid İbrahim Efendi’den aldığı bir kıt‘a arz mûcebince müstakillen kendüye tevcîh ve üzerine berat ettirmiş ise de bu def‘a kazâ-i mezbûr nâibi es-Seyyid Feyzullah Efendi dâ‘îlerinin işbu mühr-i mutâbık arzında tevliyet-i mezkûrenin nısf hissesi merkūm es-Seyyid Mehmed’in ref‘inden pederi müteveffâ-yı mezbûr es-Seyyid Osman’ın mahlûlünden merkūm es-Seyyid Osman’a tevcîh olunmasını inhâ etmeğin fi’l-hakīka tevliyet-i mezkûre müteveffâ-yı merkūm es-Seyyid Osman’ın mahlûlünden sulbî kebîr oğlu es-Seyyid Mehmed’e tevcîh olunup üzerinde olduğu derkenârdan müstebân ve merkūm Seyyid Osman merkūm es-Seyyid Mehmed’in karındaşı ve müteveffâ-yı merkūmun sulbî oğlu olduğunu kazâ-i mezbûr ahâlîsinden Der-aliyye’de müsâfiren sâkinler Ali b. Selim ve Seyyid Mehmed b. Abdullah nâm kimesneler dahi haber vermeleriyle tevliyet-i mezkûrenin nısf hissesi vazîfe-i mersûmesiyle merkūm es-Seyyid Mehmed’in ref‘inden pederi müteveffâ-yı mezbûrun mahlûlünden ber-mûceb-i şart-ı vâkıf merkūm es-Seyyid Osman üzerine tevcîh ve yedine berat-ı şerîf-i âlîşân sadaka ve ihsân buyurulmak iktizâ eylediği huzûr-ı âlîlerine i‘lâm. Sene [12]49