Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 156 Hüküm no: 160 Orijinal metin no: [30b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Niksar’ın Cedîd mahallesindeki Hoca Sultan Mescidi imamı Seyyid Hafız Abdülvahhab’ın vefatıyla imametin oğulları Seyyid Hafız Hüseyin ve Seyyid Hafız Abdullah’a tevcihi Ma‘rûz, Sâdır olan fermân-ı âlîlerine imtisâlen işbu arz ve derkenâra nazar olundukda Anadolu’da Niksar kazâsında Cedîd mahallesinde vâki‘ Hoca Sultan Mescid-i şerîfinde yevmî bir akçe vazîfe ile imâmet cihetine mutasarrıf olan es-Seyyid Hâfız Abdülvahhab fevt olup imâmet-i mezkûre vazîfe-i mersûmesiyle sulbî oğulları derûn-ı arzda isimleri mezkûr es-Seyyid Hâfız Hüseyin ve es-Seyyid Hâfız Abdullah’a ber-vech-i iştirâk tevcîhi iktizâ eder, merkūm es-Seyyid Hâfız Hüseyin karındaşı mezbûr es-Seyyid Hâfız Abdullah’ı ketm ve ihfâ ederek bir-takrîb kazâ-i mezbûr nâibi esbak es-Seyyid el-Hâc Ahmed Efendi’den aldığı bir kıt‘a arz mûcebince müstakillen kendüye tevcîh ve üzerine berat ettirmiş ise de bu def‘a kazâ-i mezbûr nâibi es-Seyyid eş-Şeyh Mehmed Efendi dâ‘îlerinin mühr-i mutâbık arzında cihet-i mezkûrenin nısf hissesi karındaşı merkūm es-Seyyid Hâfız Hüseyin’in ref‘inden pederi müteveffâ-yı mezbûr [31a] es-Seyyid Hâfız Abdülvahhab mahlûlünden merkūm es-Seyyid Hâfız Abdullah’a tevcîh olunmasını inhâ etmeğin fi’l-hakīka cihet-i mezkûre müteveffâ-yı merkūm es-Seyyid Hâfız Abdülvahhab’ın mahlûlünden sulbî kebîr oğlu es-Seyyid Hâfız Hüseyin’e tevcîh olunup üzerinde olduğu derkenârdan müstebân, mezbûr es-Seyyid Hâfız Abdullah merkūm es-Seyyid Hâfız Hüseyin’in karındaşı müteveffâ-yı merkūmun sulbî oğlu olduğu kazâ-i mezbûr ahâlîsinden Der-aliyye’de müsâfireten sâkinler Yüzbaşı nâm kimesneler dahi haber vermeleriyle cihet-i mezkûrenin nısf hissesi vazîfe-i mersûmesiyle merkūm es-Seyyid Hâfız Hüseyin’in ref‘inden pederi müteveffâ-yı mezbûrun mahlûlünden merkūm es-Seyyid Hâfız Abdullah’a tevcîh, üzerine berat-ı şerîf-i âlîşân sadaka ve ihsân buyurulmak iktizâ eylediği huzûr. Sene [12]49