Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 157 Hüküm no: 161 Orijinal metin no: [31a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habsuman kazası Karahasan köyü camii hatibliğinin Seyyid Hasan b. Mehmed’den alınarak ilk sahibi Seyyid Ali b. Hasan’a geri verilmesi Sâdır olan fermân-ı âlîlerine imtisâlen işbu arzuhâl ve derkenâra nazar olundukda Habsuman kazâsına tâbi‘ Karahasan nâm karyede vâki‘ câmi‘-i şerîfde ber-vech-i hasbî hatîb olan es-Seyyid Ali b. Hasan bâ-berât-ı âlî mutasarrıf olduğu cihete dahl îcâb etmez iken bu def‘a derûn-ı derkenârda mezkûrü’l-ism es-Seyyid Hasan nâm kimesne hilâf-ı vâki‘ bilâ-veled fevt oldu diyerek sahib-i arzuhâl mezbûr es-Seyyid Ali hâl-i hayatda ve kemâl-i sıhhatde olup gadr-i küllî olduğundan bahisle merkūmun ref‘inden kendüye tevcîh olunmasını işbu arzuhâliyle istid‘â eder, fi’l-hakīka merkūm Ali’nin bilâ-veled mahlûlünden 48 senesi Za merkūm es-Seyyid Hasan b. Mehmed’e tevcîh olunup üzerinde olduğu derkenârdan müstebân ve merkūm es-Seyyid Ali hâl-i hayatda ve kemâl-i sıhhatde olup sahib-i evveli olduğu kazâ-i mezbûr ahâlîsinden Der-aliyye’de müsâfiren sâkinler talebe-i ulûmdan Ahmed Efendi b. Halil ve Hüseyin Efendi b. Mehmed nâm mevsûku’l-kelim kimesnelerin alâ-tarîkı’ş-şehâde haber vermeleriyle zâhir ve âşikâr olmağın bu sûretde hitâbet-i mezkûr merkūm es-Seyyid Hasan’ın ref‘inden sahib-i evveli olan es-Seyyid Ali b. Hasan dâ‘îlerine kemâ-fi’s-sâbık tevcîh ve yedine berat-ı şerîf-i âlîşân i‘tâ olunması iktizâ eylediği huzûr-ı âlîlerine i‘lâm olundu. Sene [12]49