Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 158 Hüküm no: 162 Orijinal metin no: [31a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Antalya Cami‘-i Kebîr mahallesi mescidi vakfına ait ev arsasının el-Hâc Mehmed Durmuş’a ait mülk dükkânla değiştirilmesi Ma‘rûz, Sâdır olan fermân-ı âlîlerine imtisâlen işbu i‘lâm ve derkenâra nazar olundukda medîne-i Antalya’da Câmi‘-i Kebîr mahallesinde vâki‘ mescid-i şerîfin bâ-berât-ı âlîşân mütevellîsi olan Şeyh Osman Efendi b. el-Hâc Mehmed hâlî mahâllinde meclis-i şer‘a varıp mescid-i mezbûr mahallesinde kâin ma‘lûmü’l-hudûd bir bâb menzil hâl-i imâretde senevî 12 guruşa îcâr olunur ise de bundan akdem vâki‘ olan zelzeleden münhedim ve arsa-i hâliye olup cânib-i vakfa el-ân bir akçe nef‘i ve ta‘mîrine dahi vakf-ı mezkûrun müsâ‘adesi olmamağla istibdâline tâlib ve râgıb olan derûn-ı arzda mezkûrü’l-ism el-Hâc Mehmed Durmuş b. Abdurrahman’ın mülkü olup medîne-i mezbûrede neccâr çarşısında kâin senevî otuz altı guruşa îcâr olunur ma‘lûmü’l-hudûd bir bâb dükkân ile istibdâl murâd eylediklerinde taraf-ı şer‘den kâtib ve ümenâ-i şer‘ ma‘rifetleriyle keşfolundukda mülk olan dükkân vakıf olan menzil arsasıyla istibdâl min-külli’l-vücûh cihet-i vakfa evlâ ve enfa‘ idiği erbâb-ı vukūfdan ve sikāt-ı Müslimînin ihbârlarıyla zâhir ve mütehakkık ol vechile şerâit-i istibdâl mevcûd olduğu beyânıyla ber-vech-i muharrer istibdâle izn-i hümâyûnu müş‘ir bir kıt‘a emr-i celîlü’ş-şân sudûru istid‘â olunduğu meâl-i i‘lâmdan müstebân ve menzil-i mezkûr 12 guruşa îcâr olunduğu ve dükkân-ı mezbûr 36 guruşa îcâr olunduğu kazâ-i mezbûr ahâlîsinden Der-aliyye’de müsâfiren sâkinler talebe-i ulûmdan es-Seyyid Hasan Rıfat Efendi b. Mehmed Ârif ve Mehmed Sâdık b. Osman nâm mevsûku’l-kelim kimesnelerin alâ-tarîkı’ş-şehâde haber vermeleriyle vakf-ı mezbûra evlâ ve enfa‘ olmağın bu sûretde şerâit-i şer‘iyesine ri‘âyet olunmuş olduğundan istibdâli tecvîz eyleyen fukahâ-i zevi’l-ibtihâcın kavilleri üzere mülk olan dükkân-ı mezbûr [vakf] ve vakıf olan arsa-i menzil-i mezkûr mülk olmak için izn-i hümâyûnu nâtık bâlâsı tuğrâ-yı garrâ ile mu‘anven bir kıt‘a emr-i âlî istid‘âlarına müsâ‘ade-i emr-i âlîşân sudûru muvâfık-ı irâde-i seniyyeleri ise ol bâbda emr u fermân hazret-i veliyyü’l-emrindir. Sene [12]49