Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 159 Hüküm no: 164 Orijinal metin no: [31a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tokat naibi es-Seyyid İbrahim Zühdi’nin ilâmıyla vakıf için istibdâle izin istemesi Sâdır olan fermân-ı âlîlerine imtisâlen medîne-i Tokad nâibi es-Seyyid İbrahim Zühdi Efendi dâ‘îlerinin işbu sene-i mübâreke Recebi’l-ferdi târihiyle müverrah mühr-i mutâbık i‘lâmına nazar olundukda sebki üslûb-ı sakke muvâfık ve mazmûnu şer‘-i şerîfe mutâbık olup bu makūle şerâit mevcûd olduğu hâlde istibdâle nef‘an li’l-vakf ruhsat-ı hümâyûnu nâtık Dîvân-ı hümâyûn tarafından bâ-irâde-i aliyye emr-i âlî i‘tâsı dahi mesbûk idiği derkenârdan müstebân olmağın bu sûretde i‘lâm-ı mezkûrda istid‘â olunduğu üzere istibdâl-i merkūma ruhsat[ı] hâvî izn-i hümâyûnu nâtık bir kıt‘a fermân-ı celîlü’l-unvân i‘tâsı husûsuna müsâ‘ade buyurulmak iktizâ eylediği huzûr-ı âlîlerine i‘lâm olundu. Bâkī el-emr u fermân li-men-lehu’l-emrindir. Fi’l-yevmi’l-hâmis aşer min-Şevvali’l-mükerrem sene tis‘a ve erba‘în ve mieteyn ve elf.