Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 160 Hüküm no: 166 Orijinal metin no: [31b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manisa’da Sinan Bey Vakfı’na ait olup Ahmed Ağa tarafından haksız yere el konulan mukataanın Lütfullah Efendi’ye geri verilmesi Sâdır olan fermân-ı âlîlerine imtisâlen işbu arzuhâl ve meâl-i derkenâra ba‘de’n-nazar medîne-i Manisa’da mutasarrıf olduğu Sinan Bey Vakfı için senede bin guruş hazîne mukāta‘asına semere verilmeğe bâ-irâde zabt ve ta‘şîr eylediğim Çorlulu karyesi arâzîsinden dolayı Ahmed Ağa ile arz odasında vakfın ber-mûceb-i Defter-i hâkānî hâsılâtı olup vakfa âid şerbethâne ve bakkāl dükkânı ve ağıl ve değirmen ve bağçe ve resm-i iskele icâreleri ve kıst-ı çift ismiyle müsemmâ ücret-i arâzî ve gayri üzere bâ-vech-i şer‘î sulh ve yed-i âcizâneme verilen i‘lâm-ı şer‘iye mûcebince fermân-ı âlî sâdır olmuş iken otuz beş senesi merkūm Ahmed Ağa hilâf-ı inhâ bir-takrîb yedimde olan fermân-ı âlînin kaydını terkīn etdirmekle vakfa küllî gadr olduğu bast u beyân ve bir def‘a şer‘le fasl olunan müdde[‘â]nın istimâ‘ın adem-i cevâzı ve kādının verdiği hüccet mesmû‘a olmadığı aslına mebnî olarak sâbıkā nakībü’ş-şeref fazîletlü Rumeli kādıaskeri efendi dâ‘îleri merkūmun hilâf-ı inhâ ısdâr ettirdiği fermânın kaydı terkīn iktizâ eylediğini i‘lâm ve yed-i âcizâneme muvâfık-ı şer‘-i şerîf ve vech-i kānûn-ı münîf üzere fermân-ı âlîşân verilmiş iken bundan akdem Manisa nâibi olan efendi yedimde olan i‘lâmât-ı şer‘iyeye ve muvâfık-ı şer‘-i şerîf ve kānûn-ı münîf üzere olan fermân-ı âlîşâna nazar etmeyip merkūm Ahmed Ağa’nın kaydı terkīn olunan fermânda münderic ma‘mûlün-bih olmayan i‘lâmı bast ve sened ittihâz ederek verdiği i‘lâm şer‘an mu‘teber olmadığı fetvâ-yı şerîf muktezâsınca âşikâr olmağla merâhim-i aliyyelerinden mercûdur ki sulhde dâhil-i kıst-ı çift ta‘bîr olunur ücret-i arâzî merkūm Ahmed Ağa fermânım vardır deyü zabt ve gadr etmekle yedimde olan i‘lâmât-ı şer‘iye üzere bir i‘lâm abd-i bî-kesleri? yedime verilip bi-gayr-ı vechi’ş-şer‘î merkūm Ahmed Ağa’nın yedine verilen i‘lâm mûcebince sâdır olan fermân-ı âlînin kaydı terkīn birle yedine emr-i şerîf i‘tâ buyurulmak bâbında sahib-i arzuhâl müderrisîn-i kirâmdan Lütfullah Efendi dâ‘îleri istid‘â-yı inâyet eder, mütevellî-i mûmâ-ileyh Lütfullah Efendi’nin olan Cuma günü Arz Odası’nda mûmâ-ileyh Ahmed Ağa ile lede’t-terâfu‘ yedi sene müddetde hâsılât-ı vakıfda bi’t-terâzî on iki bin beş yüz guruşu hâiz? sulhlerinde arâzî tasarrufu husûsu mahâllinde şer‘le rü’yet olunacak mevâddan olduğu tasrîh ba‘dehû mahâllinde lede’t-terâfu‘ müşârün-ileyh Derviş Mehmed Paşa hazretlerinin inhâsı bast olunduğu üzere mûmâ-ileyh Ahmed Ağa arâzî-i mezkûra bâ-tapu tedâvül-i eyâdî ile tasarrufunda ve üzerinde mebnî emlâki icâre-i zemîn takrîbiyle izn-i mütevellî-i mûmâ-ileyh Ahmed Ağa binâ edip ol vechile mülkü idiği bi’l-muvâcehe sâbit ve mütehakkık olarak hükm-i şer‘î lâhık olduğu kaydı mahâlline şerh verilerek emr-i şerîf i‘tâ olunmuş idiği kuyûd-ı mezkûreden münfehim ve âşikâr ve bir def‘a şer‘le fasl olunan da‘vânın tekrar istimâ‘ı şer‘an adem-i cevâzı derkâr ve tarafeynin nizâ‘ları nizâ‘-ı lafzî olup arâzî-i mezkûre vakf-ı mezkûr müstegallâtından olduğu[nu] mûmâ-ileyh Ahmed Ağa mukırr ve mu‘terîf olduğu bi’d-defa‘ât verilen i‘lâmâtdan bedîdâr olmağla ber-mûceb-i hükm-i şer‘î emr-i şerîf mûmâ-ileyh Ahmed Ağa’nın arâzî-i mezkûreyi ta‘tîl etmeyip zirâ‘at etmek ve emlâk-i mezkûrenin sâl be-sâl icâre-i mukarreresiyle arâzî-i mezkûrenin ber-mûceb-i Defter-i hâkānî vakf-ı mezkûra âid hâsılât ve rüsûmâtı her ne ise mahâllinde beher sene cânib-i vakfa edâ ve teslîm ve sâlifü’z-zikr otuz iki senesinde zimmetinde olan erzen ve böğrülce öşürlerini henüz mütebâkī ise edâ ederek arâzî-i mezkûreyi hakk-ı makbûzu olmak ve emlâk-i mezkûreyi icâre-i mukarreresiyle bâ-izn-i mütevellî mülkü olmak üzere mûmâ-ileyh Ahmed Ağa’nın zabt ve tasarrufu iktizâ eylediği ber-vech-i muharrer mukaddemâ bi’l-muvâcehe lede’t-terâfu‘ bi’l-isbât hükm-i şer‘î ile verilen emr-i şerîf muktezâsından olmağla vech-i meşrûh üzere verilen evâmir-i seniyyenin kaydları mahallerine tekrar şerh verilip ba‘de-ezîn tarafeynden herbirerleri diğerine bî-vech müdâhale etmemek üzere i‘lâm-ı hâli mutazammın bir kıt‘a emr-i âlîşân i‘tâ buyurulması iktizâ eylediği Rumeli kādıaskeri fazîletlü Rahmi Paşa Efendi hazretleri i‘lâm etmekle imdi i‘lâmı mûcebince mahâlline şerh verilip i‘lâm-ı hâli mutazammın hüküm deyü bin iki yüz kırk dört senesi Şa‘ban’ının on yedisi târihinde sâdır olan fermân-ı âlî mûcebince …?-i merkūmeye kayd emr-i şerîf-i âlîşân verildiği keyfiyeti derkenârdan müstebân lâkin mütevellî-i mûmâ-ileyhin Manisa’da nâib olan Muhyizâde hafîdi es-Seyyid Ali Eşref Efendi’nin huzûrunda mûmâ-ileyh Ahmed Ağa gıyâbında vukū‘a gelen mürâfa‘ası hasmı gıyâbında olup ve mûmâ-ileyh Ahmed Ağa için bazı kesânın şehâdeti ihbâr kabîlinden olarak kütüb-i mu‘teberât-ı fıkhiyeden Fetvâ-yı Ali Efendi’nin Kitâbü’l-kazâ’sında Zeyd’in Amr ile bir husûsa müte‘allika da‘vâsı olmağla Zeyd kādıya varıp Amr veyâ vekîli hazır değil iken ol husûs da‘vâ ve müdde‘âsına bazı kimesneler şehâdet etmekle kādı husûs-ı mezbûru Zeyd’e hükmedip hüccet verse hükm nâfiz ve hücceti mu‘teber olur mu, el-cevâb olamaz deyü verilen bir kıt‘a fetvâ-yı şerîf mûcebince nâib-i mezbûrun verdiği i‘lâm gayr-ı sahîh ve onunla takarrur eden fermân-ı âlîşân dahi ma‘mûlün-bih olmayıp bu sûretde merkūm Ahmed Ağa’nın yedine i‘tâ kılınan fermân-ı şer‘înin kaydı bâlâsına şerh verilerek müceddeden mütevellî-i mûmâ-ileyh yedine kemâ-fi’s-sâbık emr-i âlî i‘tâsı muktezâ-yı hâl ve menût-ı re’y-i sâmîleri idiği huzûr-ı âlîlerine i‘lâm olundu. Bâkī emr u fermân hazret-i men-lehu’l-emrindir. Fi’l-yevmi’s-sâdis ve’l-işrîn min-Cumâdelûlâ sene tis‘a ve erba‘în ve mieteyn ve elf