Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 162 Hüküm no: 167 Orijinal metin no: [31b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Heybeliada’da mezarlık olarak kullanılan mahalle Dimitri v. Mihal tarafından kahvehane inşa edilmesinin önlenmesi Ma‘rûz, Sâdır olan fermân-ı âlîlerine imtisâlen cevâbı hâvî merbût olan i‘lâm meâline nazar olundukda bâ-hatt-ı hümâyûn-ı şevket-makrûn-ı şâhâne cânib-i Darbhâne-i âmire’den zabt ve idâre olunan Haremeyn-i Muhteremeyn Mukāta‘atı’ndan medîne-i Üsküdar’a muzâfe Adalar nâhiyesine tâbi‘ Maltepe ve Ada-i selâse[de] vâki‘ arâzî sahib-i arz bulunanların tapu temessükleriyle tasarruf olunagelip ancak Ada-i selâse-i merkūmeden Heybeliada re‘âyâsının hafristânı olarak terk olunan mahâll-i mu‘ayyenin beher sene mukāta‘a-i zemîni kadîmü’l-eyyâmdan berü sahib-i arz bulunan kimesnelere kenîsa-yı kadîmelerinin levâzımına mevkūfe nakdi gallesinden verilip mevtâları zuhûrunda mukāta‘a-i mezbûre mültezimi olup zâbitleri olan kimesnelere izni hâvî avâid verilerek ilkā-i hafr ederler iken bundan akdem mültezim bulunan kimesne hafristân mahâllinin bir mikdârını ada-i mezbûre re‘âyâsından Dimitri v. Mihal zimmîye tapu temessüküyle ahâlîsinin haberi yoğiken verip zimmî-i mersûm dahi birkaç def‘a üzerine kahvehâne inşâ ve ihdâsına mübâşeret ve ahâlîsi hükkâma i‘lâm edip hükkâm dahi men‘ etmiş ise de bu def‘a gene kahvehâne inşâsına şürû‘ ve el-yevm sahib-i arz olan Şâkir Ağa kullarının izni olmadığını ve ahâlîsinin kemâ-kân men‘ u ref‘ini iltimâs eyledikleri nâhiye-i mezbûre nâibi es-Seyyid Mehmed Şemseddin Efendi dâ‘îlerinin i‘lâmından müstebân olup bu sûretde el-kadîmü yütreku alâ kıdemihî mısdâkınca mahâll-i mezkûr kadîmi üzere ahâlîsinin hafristânı olarak terk olunup mukāta‘a-i zemîni beher sene sahib-i arz olanlara verilir iken merkūm Dimitri zimmînin hafristân mahâlline kahvehâne ihdâsı hilâf-ı şer‘-i şerîf olduğu huzûr-ı âlîlerine i‘lâm olundu. Sene [12]49