Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 166 Hüküm no: 173 Orijinal metin no: [32b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gercanis kazası Sipdiğin köyü camii imam ve hatibi Seyyid Süleyman’ın vefatı üzerine yerine oğlu Seyyid Mahmud’un tayini Gercanis kazâsına tâbi‘ Sipdiğin nâm karyede vâki‘ Hüseyin Efendi nâm sahibü’l-hayrın binâ eylediği câmi‘-i şerîfde ber-vech-i hasbî imâmet ve hitâbet cihetleri Seyyid Ebûbekir’in üzerinde olduğu askerî rûznâmçesinden derkenâr olunmağla meâl-i arzuhâl ve derkenâra nazara nazaran iktizâsı i‘lâm olunmak bâbında sâdır olan fermân-ı âlîşâna imtisâlen karye-i mezbûre ahâlîsinden Der-aliyye’de bulunan Hüseyin b. Mustafa ve Mehmed b. Halil nâm kimesneler meclis-i şer‘a celb ile keyfiyeti etrâfıyla suâl olundukda derûn-ı arzuhâlde tahrîr ve inhâ kılındığı üzere merkūm Seyyid Süleyman’ın fevti vâki‘ ve sahib-i arzuhâl merkūm Seyyid Mahmud sulbî sahîh oğlu olup her vechile muhtâr-ı cemâ‘at olduğu ve merkūmândan herbiri alâ-tarîkı’ş-şehâde haber vermeleriyle zâhir ve nümâyân olmağın bu sûretde imâmet ve hitâbet cihetleri babası müteveffâ-yı mezbûrun mahlûlünden oğlu merkūm Mahmud’a tevcîh ve yedine bir kıt‘a berat-ı şerîf-i âlîşân inâyet ve ihsân i‘tâ buyurulmak iktizâ eylediği huzûr-ı âlîlerine i‘lâm olundu. Fî 29 L sene [12]49