Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 87 Hüküm no: 88 Orijinal metin no: [18b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yenicekalesi Mustahfızı Mustafa’nın tımarını bir seneliğine Hüseyin Ağa ile Osman Ağa’ya iltizam ettiği Vech-i tahrîr-i hurûf budur ki Kocaeli sancağında Gekbûze nâhiyesinde Yakacık ve Kartal toprağında vâki‘ dokuz yüz akçe bâ-berat-ı şerîf-i âlîşân ile Yenicekale mustahfızlığı gediği tımâra mutasarrıf olduğum tımârımın işbu bin yüz seksen senesi Martı ibtidâsından sene-i mezbûr Şubat’ı gāyetine gelince bir senelik iltizâmı işbu bâ‘isü’t-temessük izzetlü Hüseyin Ağa ve Osman Ağa’ya sene-i sâbıkları mûcebince beş yüz guruşa der-uhde ve iltizâm olunup bedel-i iltizâmı olan meblağ-ı mezbûru ağa-yı mezbûrân yedlerinden tamâmen ve kâmilen ahz ü kabz edüp gerekdir ki sene-i mezbûre tamâmına değin tarafıma âid olan a‘şâr-ı şer‘iye ve rüsûm-ı örfiye ve tapu-yı zemîn ve nısf-ı bâd-ı hevâ ve cürm ü cinâyet ve resm-i arûsâne ve yava ve kaçgun ve sâiresi cüz‘î ve küllî her ne ise sene-i sâbıkālarında alınageldiği minvâl-i meşrûh üzere ağa-yı mezbûrânı üzerinize zâbit bilüp her ne türlü mürâca‘at olunur ise ağa-yı mezbûrân ile eyleyesin her hâlde zâbit bilesiz bundan mukaddem ve mu’ahhar târîhiyle temessüküm zuhûr eder ise bir türlü amel ve i‘tibâr olunmaya ancak yedlerine vaz‘ ve i‘tâ olunan temessük ile amel olunmak bâbında işbu zabt temessükü verildi tarafımdan ve taraf-ı âhardan bir gayrı kimesne dahl ü ta‘arruz kılmayalar ve’s-selâm. Bende Mustafa Yenicekalesi Mustahfızı hâlâ