Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 88 Hüküm no: 89 Orijinal metin no: [18b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola v. Sarafil’in evini iki adet bağını ve bazı eşyalarını oğluna sattığı Medîne-i Üsküdar’a muzâfe Adalar nâhiyesine tâbi‘ Maldepe karyesi mütemekkinlerinden Nikola v. Sarafil zimmî meclis-i şer‘-i hatîr-i lâzimü’t-tevkīrde sulbî kebîr oğlu işbu râfi‘ü’r-rakīm Kostandi zimmî muvâcehesinde ikrâr ve takrîr-i kelâm edüp akd-i âti’z-zikrin sudûruna değin yedimde mülküm olup karye-i mezbûrede vâki‘ bir tarafı Gümüş zimmî menzili ve bir tarafı Angelino zimmî menzili ve bir tarafı Hıristo zimmî menzili ve bir tarafı tarîk-i âm ile mahdûd fevkānî iki bâb oda ve tahtında ahır ve sokak kapısını müştemil mülk menzilimi bi-cümleti’t-tevâbi‘ ve’l-levâhık dört yüz guruşa ve yine iki aded bağ ile dört aded tâbe ve iki aded tencere ve bir aded sini ve bir yorgan ve bir Yanbolu kesesi ve bir döşek ve bir ince kilim ve bir laza ve bir varil ve bostanlarında vâki‘ dört aded direk ve dört aded seren ve dört aded batman ve dört aded gönder ve bir gerdel ve ma‘lûm havlumu bi-safkatin vâhidetin [dört yüz] kırk guruşa tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile oğlum müşterî-i merkūm Kostandi zimmîye bey‘ u teslîm ve temlîk eylediğimde ol dahi ber-vech-i muharrer iştirâ ve tesellüm ve temellük ve kabz u kabûl eyledikden sonra semeni olan meblağ-ı mezkûr dört yüz kırk guruşu oğlum müşterî-i merkūm, kızım Visaye’nin emrim ile cihâzına sarf ve istihlâk eyledi fîmâ-ba‘d zikri mürûr eden menzilde ve eşyâ-i muharrere-i mezkûrda vechen mine’l-vücûh ve sebeben [mine’l-esbâb] kat‘â ve kātıbeten benim alâka ve medhalim kalmayup oğlum müşterî-i mezbûrun mülk-i müşterâsı ve hakk-ı sırf-ı sahîhi olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’s-sâdis ve’l-ışrîn min-Zilhicceti’ş-şerîfe li-sene semânîn ve mi’ete ve elf. Şuhûdü’l-hâl: Es-Seyyid ( ) Efendi, Kayseriyeli Mehmed Beşe, Ahmed Efendi, Molla Ali, Molla Ömer, Abdullah Beşe?, ...? Mehmed Beşe. Anaştaş v. Yorgi, Aci Angeli v. Kuriş, Sarafil? v. Nikola, ...? Vangel v. İstarinos?, Filikodoş v. Varsam?.