Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 167 Hüküm no: 175 Orijinal metin no: [32b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ruha kazası Suruç nâhiyesindeki Şeyh Müslim Zaviyesi’nde loğkeşlik hissesine sahip Seyyid Ali’nin vefatıyla hissesinin Şeyh Ömer, Şeyh Hüseyin, Şeyh Müslim ve Şeyh Ahmed’e tevcihi Ma‘rûz, Sâdır olan fermân-ı âlîlerine imtisâlen işbu istid‘â ve derkenâra nazar olundukda Ruha kazâsına tâbi‘ Suruç kazâsında medfûn Şeyh Müslim Zâviyesi’nin yedi buçuk akçe vazîfe ile rub‘ hisse cihetine mutasarrıf olan es-Seyyid Ali bilâ-veled fevt olup mahlûlünden rub‘ hisse-i loğkeşlik-i mezkûre vazîfe-i mezkûresiyle kendülere tevcîh olunmasını sahib-i arzuhâller Şeyh Ömer ve Şeyh Hüseyin ve Şeyh Müslim ve Şeyh Ahmed dâ‘îleri işbu arzuhâlleriyle istid‘â ederler, loğkeşlik-i mezkûr vazîfe-i mersûmeleriyle el-yevm bâ-berât-ı âlî mezbûr es-Seyyid Ali ve es-Seyyid Müslim b. es-Seyyid İbrahim nâm karındaşların bâ-berât-ı âlî nısf hisse üzerlerinde olduğu askerî rûznâmçesi derkenârından müstebân ve husûs-ı mezkûr kazâ-i mezbûr ahâlîsinden Der-aliyye’de müsâfiren sâkinler Hâfız Ahmed b. Ali ve Şeyh Hüseyin b. Abbas nâm kimesnelerden istihbâr olundukda merkūm es-Seyyid Ali’nin fevti vâki‘ ve karındaşı ve müştereki Şeyh Müslim müteveffâ-yı merkūmun hissesine rağbet etmeyip ve sahib-i arzuhâller merkūmûn her vechile loğkeşlik-i mezkûrenin uhdesinden gelmeğe kādir ve mahâll-i merhamet olduklarını merkūmândan herbiri alâ-tarîkı’ş-şehâde haber vermeleriyle rub‘ hisse loğkeşlik-i mezbûre vazîfe-i mersûmeleriyle müteveffâ-yı merkūmun bilâ-veled mahlûlünden ve karındaşı ve müştereki merkūmun adem-i rağbetinden sahib-i arzuhâller merkūmûn Şeyh Ömer ve Şeyh Hüseyin ve Şeyh Müslim ve Şeyh Ahmed dâ‘îlerine iştirâken tevcîh ve yedlerine berat-ı şerîf-i âlîşân sadaka ve ihsân buyurulmak husûsu re’y-i sâmîlerine menût idiği huzûr-ı âlîlerine i‘lâm olundu. Fî 25 Z sene [12]49