Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 168 Hüküm no: 176 Orijinal metin no: [32b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ruha kazası Suruç nâhiyesindeki Şeyh Müslim Zaviyesi Vakfı’nın meşihat görevini Seyyid Ali Halîfe’nin terk etmesinden başkasına verilmesi Ma‘rûz, Sâdır olan fermân-ı âlîlerine imtisâlen işbu arz ve derkenâra nazar olundukda Ruha kazâsında Suruç nâhiyesinde vâki‘ Şeyh Müslim Zâviyesi Vakfı’nın nısf meşîhat ciheti ve nısf vazîfe-i mu‘ayyene ile bâ-berât-ı âlîşân es-Seyyid Ali Halîfe’nin bin iki yüz yirmi beş senesinden berü üzerinde olduğu Anadolu Muhâsebesi’nden muhrec derkenârdan müstebân, merkūm Ali terk-i hizmet olup ref‘inden âhara verilmesi bâbında vakf-ı mezkûr mütevellîsi es-Seyyid Ali dâ‘îleri mühr-i mutâbık arzıyla inhâ eder, yirmi dört seneden ziyâde mürûr etmiş ancak terk-i hizmet olduğu mahâllinde bi’l-muvâcehe huzûr-ı şer‘-i şerîfde sâbit olmağa tevakkuf eder mevâddan olup yalnız mütevellîsi arzıyla ref‘i mugāyir-i şer‘-i şerîf olduğu ma‘lûm-ı devletleri oldukda emr [u] fermân hazret-i veliyyü’l-emrindir. Sene [12]49