Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 168 Hüküm no: 177 Orijinal metin no: [33a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Divriği kazasında Sarı Mustafa Mescidi Vakfı’nın tevliyet ve mescidde tilavet-i Kur’ân ciheti hissesine mutasarrıf İsmail b. İbrahim’in vefatıyla hissesinin hak sahiplerine tevcihi Sâdır olan fermân-ı âlîlerine imtisâlen işbu arzuhâl ve derkenâra nazar olundukda Divriği kazâsında vâki‘ Sarı Mustafa nâm sahibü’l-hayrın binâ eylediği mescid-i şerîfi vakfının tevliyeti evlâdiyet ve meşrûtiyet üzere tevliyet-i mezkûrun nısf hissesini ve mescid-i mezbûrda tâlî-i Kur’ân-ı azîmü’ş-şân cihetinin nısf hissesi cihetleri bâ-berât-ı âlî mutasarrıfları İsmail ve Ömer b. İbrahim nâm karındaşların iştirâken üzerlerinde iken mezbûr İsmail bilâ-veled fevt oldukda hissesi batn-ı evvelde olan müşterekleri sahib-i arzuhâller el-Hâc Mustafa ve Mehmed Emin b. Abdünnebi ve Ebûbekir b. Ebûbekir nâm müşterekler hisselerine ilhâkan tevcîh olunacak iken müteveffâ-yı merkūmun hissesi karındaşı mezbûr Ömer hilâf-ı şart-ı vâkıf bir-takrîb kendi hissesine tevcîh ettirtip kendilerine gadr-i küllî olduğundan bahisle merkūm Ömer ile sahib-i arzuhâller mahâllinde bi’l-muvâcehe terâfu‘-i şer‘-i şerîf olunmak bâbında bir kıt‘a emr-i âlî niyâzında oldukları arzuhâl-i mezkûrdan müstefâd olup fi’l-hakīka evlâdiyet ve meşrûtiyet üzere tevliyet-i tâlî-i Kur’ân-ı azîmü’ş-şân cihetinin nısf hissesi mezbûr Ömer b. İbrahim’in ve nısf-ı âhar sülüs ve sülüs-i âhar nısfı mezbûr Ebûbekir b. Ebûbekir’in bâkīsi dahi mezbûrân Mustafa ve Mehmed Emin b. Abdullah nâm müştereklerin başka başka beratıyla üzerlerinde olduğu derkenârdan müstebân ve sahib-i arzuhâllerin yedlerinde bulunan sicilden muhrec vakfiye hüccet-i şer‘iyesi aklâmdan kaydı olunup tescîli sâbit olmayan evkāf-ı kadîmde şer‘an amel-i kadîm mu‘teber olup bu âna kadar ne vechile tasarruf olunageldi ise ol vechile olmak şer‘an lâzım geldiğinden sahib-i arzuhâller ile merkūm Ömer bi’l-muvâcehe mürâfa‘aya muhtâc oldukları ma‘lûm-ı devletleri buyruldukda mahâllinde meclis-i şer‘-i şerîfde tarafeyn bi’l-muvâcehe ber-nehc-i şer‘î mürâfa‘aya havâle buyurulmak bâbında bâlâsı tuğrâ-yı garrâ ile mu‘anven bir kıt‘a emr-i âlîşân [i‘tâsı] iktizâ eylediği huzûr-ı âlîlerine i‘lâm olundu. Fî 21 Z sene [12]49