Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 169 Hüküm no: 178 Orijinal metin no: [33a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Akhisar-ı Geyve kazası Kirasiye köyündeki Çavuşzâde tarafından yaptırılan caminin hatibi İbrahim b. Ahmed’in görevini Ali b. Mehmed’e devretmesi Ma‘rûz, Sâdır olan fermân-ı âlîlerine imtisâlen işbu arz ve derkenâra nazar olundukda Akhisar-ı Geyve kazâsına tâbi‘ Kirasiye nâm karyede vâki‘ Çavuşzâde nâm sahibü’l-hayrın binâ eylediği câmi‘-i şerîfde yevm[î] nîm akçe vazîfe ile hatîb olan İbrahim b. Ahmed kendi hüsn-i rızâ ve tayyib-i ihtiyârıyla mutasarrıf olduğu hitâbet-i mezkûru derûn-ı arzda muharrerü’l-ism Ali Halîfe b. Mehmed’e ferâğ ve kasr-ı yed edip berat-ı atîkin teslîm etmekle cihet-i mezkûr fâriğ-i merkūm İbrahim’in kasr-ı yedinden mezbûr Ali b. Mehmed’e tevcîh olunmasını kazâ-i mezbûr nâibi es-Seyyid Mehmed Necib Efendi mühr-i mutâbık arzıyla inhâ ve hitâbet-i mezkûre vazîfe-i mu‘ayyenesiyle mezbûr İbrahim b. Ahmed’in üzerinde olduğu derkenârdan müstebân ve merkūm İbrahim sahib-i berat olup hüsn-i rızâsıyla kasr-ı yed ve yedinde olan berat-ı şerîfi meclis-i şer‘-i âlîde teslîm ettiğini ve mezbûr Ali Halîfe’nin hitâbet-i mezkûreye ehliyet ve istihkākı kazâ-i mezbûr ahâlîsinden mahmiye-i İstanbul’da müsâfiren sâkinler talebe-i ulûmdan Hâfız Mehmed Said Efendi b. Ahmed ve es-Seyyid İsmail Efendi b. Ahmed ve Hâfız Osman b. Mehmed nâm kimesnelerin haber vermeleriyle zâhir ve mütehakkık olmağın bu sûretde hitâbet-i mezkûre merkūm İbrahim’in ferâğ ve kasr-ı yedinden mezbûr Ali b. Mehmed dâ‘îlerine tevcîh ve yedine müceddeden berat-ı şerîf-i âlîşân sadaka ve ihsân buyurulmak iktizâ eylediği huzûr-ı âlîlerine i‘lâm olundu. Fî 12 M sene [1]250