Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 170 Hüküm no: 179 Orijinal metin no: [33a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Beyşehir kazası Devletşah köyündeki Hamza Ağa Vakfı’ndan eczahanlık ciheti mutasarrıfı Seyyid Mehmed Ali b. Seyyid Durmuş’un kaybettiği beratının yenilenmesi Ma‘rûz, Sâdır olan fermân-ı âlîlerine imtisâlen işbu arzuhâl ve derkenâra nazar olundukda Beyşehri kazâsında Devletşah nâm karyede vâki‘ Hamza Ağa eczâ-i şerîf tilâvet olunmak üzere Döğene mezrâ‘ası Tâceddid? evlâdının ebnâsına vakf olunup ber-mûceb-i şart-ı vâkıf üzere mezrâ‘a-i mezkûrun rub‘ hissesi es-Seyyid Mehmed Ali b. es-Seyyid Durmuş ve üç rub‘ hisse-i âharı dahi es-Seyyid Hâfız Mustafa b. Mustafa’nın başka başka berat ile üzerlerinde olduğu askerî rûznâmçesi derkenârından müstebân olup husûs-ı mezkûra vukūf-ı tâmları olan karye-i mezbûre ahâlîsinden bu esnâda Der-aliyye’de müsâfireten sâkinler Ahmed b. Hasan ve Veli b. Süleyman ve Mustafa b. Ali ve Abdullah b. Osman nâm kimesneler meclis-i şer‘-i şerîfe celb ile etrâfıyla suâl olundukda derûn-ı arzuhâlde mezkûrü’l-ism Durmuş sahib-i arzuhâllerin büyük babaları olup kendi pederleri mezbûr es-Seyyid Mehmed Ali b. es-Seyyid Durmuş el-ân fevti gayr-ı vâki‘ ve hâlâ hayatda ve kemâl-i sıhhatde olup müsinn ü ihtiyâr olmağla zikrolunan rub‘ hisse eczâhânlık cihetine mutasarrıf olduğu berat-ı şerîfi bi-kazâillâhi te‘âlâ zâyi‘ olduğu ma‘lûmumuzdur deyü her[biri] alâ-tarîkı’ş-şehâde haber vermeleriyle mûmâ-ileyh Mehmed Ali’nin sulbî oğulları sahib-i arzuhâllerin istid‘âları hilâf-ı vâki‘ olduğu muhbirûn-ı mezbûrûnun ihbârlarıyla zâhir ve âşikâr olmağın bu sûretde ber-mûceb-i derkenâr mûmâ-ileyh es-Seyyid Mehmed Ali dâ‘îlerine zâyi‘den müceddeden bir kıt‘a berat-ı şerîf-i âlîşân sadaka ve ihsân buyurulmak iktizâ eylediği huzûr-ı âlîlerine i‘lâm olundu. Bâkī emr u fermân hazret-i men-lehu’l-emrindir. Fî 5 M sene [1]250