Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 171 Hüküm no: 180 Orijinal metin no: [33b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sivas kazasındaki Ahî Emir Ahmed Zaviyesi’nin imamı Seyyid Mehmed’in vefatıyla yerine Seyyid Mehmed b. Seyyid Abdullah’ın tayini Ma‘rûz, Sâdır olan fermân-ı âlîlerine imtisâlen işbu arzuhâl ve derkenâra nazar olundukda Sivas kazâsında Ahî [E]mir Ahmed Zâviyesi’nin vakfiye-i ma‘mûlün-bihâsında Tokmak mahallesinde zâviyesinin evkāt-ı hamsede imâm olanlara zâviye-i mezbûrenin mahsûlünden senede bir mut hınta vazîfe vakf ve şart edip ber-mûceb-i şart-ı vâkıf imâm olan es-Seyyid Mehmed b. Seyyid İbrahim bilâ-veled fevt olup yeri hâlî ve hizmet-i lâzımesi mahlûl olduğu[ndan] bahisle sahib-i arzuhâl es-Seyyid Mehmed b. es-Seyyid Abdullah müteveffâ-yı mezbûrun mahlûlünden kendüye tevcîh olunmasını istirhâm etmekle cihet-i mezbûre mezbûr Seyyid Mehmed b. es-Seyyid İbrahim’in bâ-berât-ı âlî el-yevm üzerinde olduğu askerî rûznâmçesi derkenârında bedîdâr olmağla fi’l-hakīka müteveffâ-yı mezbûr Seyyid Mehmed b. Seyyid İbrahim’in bilâ-veled fevtiyle sahib-i arzuhâl-i mezbûrun imâmete ehliyet ve istikāmete istihkākı kazâ-i mezbûr ahâlîsinden Der-aliyye’de müsâfireten sâkinler İbrahim b. Yusuf ve Ahmed b. Mehmed’in alâ-tarîkı’ş-şehâde haberlerinden zâhir ve mütehakkık olmağın bu sûretde imâmet ciheti vazîfe-i mersûmesiyle müteveffâ-yı mezbûrun bilâ-veled mahlûlünden sahib-i arzuhâl mezbûr Seyyid Mehmed b. Abdullah dâ‘îlerine tevcîh ve yedine berat-ı şerîf-i âlîşân sadaka ve ihsân buyurulmak muktezâ-yı hâlden olduğu huzûr-ı âlîlerine i‘lâm olundu. Fî 7 M sene [1]250