Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 171 Hüküm no: 181 Orijinal metin no: [33b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yenişehir-i Aydın kazası Karacasu kasabası Dağlı mahallesindeki Tosyalızâde Hacı Mehmed Ağa’nın yaptırdığı çeşmeler vakfının mütevellisi Mehmed b. el-Hâc Abdurrahman’ın vefatıyla yerine el-Hâc İsmail’in tayini Ma‘rûz, Sâdır olan fermân-ı âlîlerine imtisâlen işbu arzuhâl ve derkenâra nazar olundukda vilâyet-i Anadolu’da Yenişehir-i Aydın kazâsına muzâfe Karacasu kasabası mahallâtından Dağlı mahallesinde kâin Tosyalızâde merhûm Hacı Mehmed Ağa’nın binâ ve ihyâ eylediği çeşmelerine cereyân eden mâ-i lezîzin yollarını ta‘mîr ve termîmine ber-vech-i hasbî mütevellîsi olan merhûmun evlâdından ammisi oğlu Mehmed b. el-Hâc Abdurrahman bilâ-veled fevt olmağla tevliyet-i mezkûre mahlûlünden el-Hâc İsmail b. el-Hâc İsmail kendüye tevcîh buyurulmasını istid‘â-yı inâyet etmeğin tevliyet-i mezkûre müteveffâ-yı mezkûr Mehmed b. el-Hâc Abdurrahman b. vâkıfu’l-merhûm Tosyalızâde el-Hâc Mehmed’in bâ-berât-ı âlî üzerinde olduğu askerî rûznâmçesi derkenârından müstebân olmağın fi’l-hakīka müteveffâ-yı mezbûrun bilâ-veled vefâtı ve sahib-i arzuhâl vâkıfın evlâdından müteveffâ-yı mezbûr ammisi oğlu olup tevliyet-i mezkûra ehakku-ileyh olduğu kazâ-i mezbûr ahâlîsinden Der-aliyye’de müsâfiren sâkinler Şeyh Mehmed b. Hâfız Ömer ve Mehmed b. Hüseyin’in alâ-tarîkı’ş-şehâde ihbârlarıyla zâhir ve mütehakkık olmağın tevliyet-i mezkûre müteveffâ-yı mezbûr ammisi oğlu Mehmed’in bilâ-veled mahlûlünden sahib-i arzuhâl el-Hâc İsmail dâ‘îlerine tevcîh ve yedine berat-ı şerîf-i âlîşân sadaka ve ihsân buyurulmak iktizâ eylediği huzûr-ı âlîlerine i‘lâm olundu. Fî 27 M sene [1]250