Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 172 Hüküm no: 182 Orijinal metin no: [33b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Amasya Melek Mescidi imamlığının Hâfız Ali Halîfe b. Mehmed’den alınarak Seyyid Hâfız Mustafa Efendi b. Mehmed’e verilmesi Ma‘rûz, Medîne-i Amasya nâibi es-Seyyid Mustafa Tevfik Efendi dâ‘îlerinin mühr-i mutâbık i‘lâmı bâlâsına sâdır olan fermân-ı âlîlerine imtisâlen i‘lâm-ı mezkûr ile derkenârlara nazar olundukda medîne-i mezbûrede Melek Mescid-i şerîfi Vakfı’ndan olmak üzere yevmî bir akçe vazîfe ile imâmet ciheti es-Seyyid Ahmed Halîfe veledeş üzerinde iken fevt olup mahlûlünden bin iki yüz kırk dört senesi Zilhicce’sinde es-Seyyid Hasan Halîfe v. es-Seyyid Ahmed veledeşe tevzî‘ olunup ba‘dehû mezbûr es-Seyyid Hasan’ın kasr-ı yedinden iki yüz kırk beş senesi Cemâziyelâhire’sinde Seyyid Abdullah Efendi b. Molla Halil’e tevcîh olundukdan sonra kezâlik mezbûrun kasr-ı yedinden iki yüz kırk yedi senesi Muharrem’inde es-Seyyid Hâfız Mustafa Efendi b. Mehmed’e tevcîh olunup bâ-berât üzerinde iken Hâfız Ali Halîfe b. Mehmed zuhûra gelip imâmet-i mezkûrenin mutasarrıf-ı evveli merkūm es-Seyyid Ahmed benim min-kıbeli’l-eb ceddim olup fevt oldukda cihet-i mezkûre sulbî oğlu babam es-Seyyid Mehmed’e tevcîh olunacak iken kable’s-sebti’t-tevcîh babam mezbûr es-Seyyid Mehmed dahi fevt olup cihet-i mezkûre kendüye tevcîh olunmasını istid‘â ve gıyâb-ı hasmda iki nefer kimesneler haberleriyle mezbûr es-Seyyid Hâfız Mustafa Efendi’nin ref‘inden bin iki yüz kırk dokuz senesi Receb’in on üçüncü günü mezbûr Hâfız Ali Halîfe’ye tevcîh olunduğu derkenârdan müstebân ise de bu def‘a merkūm es-Seyyid Hâfız Mustafa’nın vekîl-i şer‘îsi es-Seyyid Mehmed b. Abdullah medîne-i mezbûre mahkemesinde huzûr-ı hâkimü’ş-şer‘de merkūm Hâfız Ali’nin babası mezbûr Mehmed b. Mustafa muvâcehesinde mescid-i mezkûr cemâ‘ati hazır olduğu hâlde mezbûr Ali Hâfız olmayıp el-yevm üç yaşında olup müteveffâ-yı evvel-i mezbûr es-Seyyid Hâfız Ahmed’in kızkarındaşı oğlu olduğundan babası mezbûr Mehmed bir-takrîb hîleye sülûk birle bilâ-veled fevt olan mezbûr es-Seyyid Hâfız Ahmed’in oğlunun oğlu benim diyerek hilâf-ı vâki‘ olduğu ba‘de’t-terâfu‘ herbirerleri bi’l-muvâcehe haber vermeleriyle cihet-i mezkûre sagīr-i merkūm Ali’nin üzerinden ref‘ ve sahib-i evveli olup muhtâr-ı cemâ‘at olan mezbûr es-Seyyid Hâfız Mustafa’[ya] tevcîh ve yedine berat-ı şerîf-i âlîşân sadaka buyurulmak niyâzında olduğu i‘lâm-ı mezkûrdan nümâyân ve mazmûn-ı i‘lâm-ı mezkûr dahi müsbet olmağın cihet-i mezkûre vazîfe-i mersûmesiyle sagīr-i merkūm Ali’nin üzerinden ref‘ ve sahib-i evveli Hâfız Mustafa’ya tevcîh ve yedine berat-ı şerîf-i âlîşân sadaka ve ihsân buyurulması re’y-i sâmîlerine menût idiği huzûr-ı âlîlerine i‘lâm olundu. Fî 25 M sene [1]250