Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 173 Hüküm no: 183 Orijinal metin no: [33b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kapıcıbaşılardan Abdullah Ağa’nın Yenipazar kazası halkından bazı kimselerdeki alacağını tahsil etmek istemesi Ma‘rûz, Sâdır olan fermân-ı âlîlerine imtisâlen arzuhâl ve kaydı derkenâr kılınan fermân-ı âlî ve sahib-i arzuhâlin yedinde olan bir kıt‘a i‘lâma ba‘de’n-nazar iki yüz otuz beş senesi hilâlinde Aydın sancağında mütesellimliği evânında livâ-i mezbûr kazâlarından Yenipazar kazâsının rûz-ı hızır tevzî‘i maslahatlarına kazâ-i mezbûr vücûhundan el-Hâc Mehmed ve diğer Mehmed ve Hacı Mustafa ve Ahmed ve diğer Ahmed nâm kimesnelerin bi-şarti’r-rücû‘ emirlerine binâen kendi mâlından kadr-ı ma‘rûf elli bin guruş masrûf-ı âcizânemden gayr-ı ez-tahsîl bâkī kalan on altı bin iki yüz guruşu merkūmlardan taleb ve tahsîli bâbında şeref-rîz-i sahîfe-i sudûr olan fermân-ı celîlü’ş-şân ve vekîlim Osman Ağa kulları vesâtatıyla mahâlline lede’l-vürûd ve’r-râfi‘ merkūmların cevâbı iki yüz otuz senesine mahsûben rûz-ı hızır tevzî‘i mahâlline te’diye ettik habbe-i vâhide deynimiz kalmadı deyü gönderdikleri i‘lâmları matlûb-ı kulları iki yüz otuz beş senesi mâlı idiğinden da‘vâ tenâkuzdan ibâret ve mahâllinde merkūmlar ile mukāvemet bir vechile [34a] imkânda olmayıp her vechile kendüye gadr-i küllî eylediklerinden bahisle merkūmları Der-aliyye’ye ihzâr ve huzûr-ı sadr-ı âsâfîde terâfu‘-i şer‘ ve ihkāk-ı hak olunması bâbında sahib-i arzuhâl ser-bevvâbîn-i Dergâh-ı âlî Abdullah Ağa dâ‘îleri bir kıt‘a mübâşirli emr-i âlî sudûrunu arzuhâl takdîmiyle istid‘â’[-yı] inâyet eder, fi’l-hakīka mûmâ-ileyh Abdullah Ağa bundan akdem bir kıt‘a fermân-ı âlî ısdârında tarafından vekîli olan Osman nâm kimesne Güzelhisar mahkemesinde huzûr-ı şer‘de yüz Bozdoğan kazâsına tâbi‘ Yenipazar ahâlîsinden Hacı Mehmed b. Veli ve Dere karyesi ahâlîsinden diğer Hacı Mehmed b. Ahmed ve Donduran’dan Hacı Mustafa b. Ahmed ve Pirecik’den Ahmed b. Mustafa ve Kavaklı’dan diğer Ahmed b. Mehmed’den müvekkil-i mûmâ-ileyhe iki yüz otuz senesine mahsûben rûz-ı hızır tevzî‘i maslahatlarından bi’ş-şarti’r-rücû‘ emirleriyle kendi mâlından sarf eylediği meblağdan bâkī 16.800 guruşu emirlerine binâen bi’l-mürâca‘a merkūmûndan bi’l-vekâle mutâlebe eylediğinde onlar dahi emirlerini inkâr birle vekîl-i mezbûr da‘vâ-yı mezkûr[u] ityândan âcizler olup merkūmûnu tahlîfe dahi adem-i rağbet birle vekîl-i mezbûr Osman mezbûrûndan bilâ-beyyine mu‘ârazadan men‘ olunduğu sahib-i arzuhâlin yedinde olan hâlâ Güzelhisar nâibi Hammâmîzâde Mehmed Ârif Efendi’nin verdiği bir kıt‘a i‘lâmından müstebân olmağın bu sûretde sahib-i arzuhâl-i mûmâ-ileyh Abdullah Ağa merkūmûn Hacı Mehmed ve Hacı Mustafa ve diğer Hacı Mehmed ve Ahmed ve diğer Ahmed’in bi-şarti’r-rücû‘ umûr-ı ma‘lûmelerine kendi mâlından meblağ-ı bâkī mezbûr 16.800 guruşu harc u sarf eylediği bi’l-muvâcehe ber-nehc-i şer‘î sâbit ve tebyîn eder ise meblağ-ı mezbûrun merkūmûndan tahsîli îcâb edeceği emr-i meşrû‘ olmağla merkūmûn Hacı Mehmed ve Hacı Mustafa ve diğer Hacı Mehmed ve Ahmed ve diğer Ahmed’in bi-şarti’r-rücû‘ umûr-ı ma‘lûmelerine kendi mâlından meblağ-ı bâkī-i mezbûr 16.800 guruşu harc u sarf eylediği bi’l-muvâcehe ber-nehc-i şer‘î sâbit ve tebyîn eder ise meblağ-ı mezbûrun merkūmûndan tahsîli îcâb edeceği emr-i meşrû‘ olmağla merkūmûn Hacı Mehmed ve Hacı Mustafa ve diğer Hacı Mehmed ve Ahmed ve diğer Ahmed’in li-ecli’t-terâfu‘ Der-aliyye’ye ihzârları bâbında mübâşirli bir kıt‘a emr-i âlî sudûru menût-ı re’y-i âlîleri idiği huzûr-ı âlîlerine i‘lâm olundu. Fî 29 M sene [1]250