Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 89 Hüküm no: 90 Orijinal metin no: [19a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bulgaroğlu Mehmed Beşe’nin bazı eşyalarıyla birlikte evini ve iki bağını Nalband Halil Beşe ile karısı Habibe’ye sattığı Medîne-i Üsküdar’a muzâfe Adalar nâhiyesine tâbi‘ Dolayoba karyesinde sâkin Bulgaroğlu Mehmed Beşe b. Mustafa nâm kimesne tarafından ber-vech-i âti’l-beyanda vekîl olduğu Halil Beşe b. Ahmed Tanburacıoğlu Ali Beşe b. Mehmed şehâdetleriyle sâbitü’l-vekâlesi Pazarköylü İbrahim Beşe b. Ali meclis-i şer‘-i hatîrde dâmâdı ve kızının kızı işbu bâ‘iseyü’l-vesîka Nalband Halil Beşe b. Mehmed ve Habibe bt. İsmail mahzarında bi’l-vekâle ikrâr ve takrîr-i kelâm edüp akd-i câ’i’z-zikrin sudûruna değin müvekkilim mezbûrun yedinde mülkü olup Temenna toprağında Zeytinliağıl altında vâki‘ bir tarafı karındaşı oğlu Ahmed Beşe tarlası ve bir tarafı Bulgaroğlu Halil Beşe bağı ve bir tarafı Ömer Reis bağı ve bir tarafı tarîk-i âm ile mahdûd tahmînen üç dönüm kürûmî mülk bir kıt‘a dut ve kış bağını altmış guruşa ve yine vakıf toprağında Ayazma kurbünde vâki‘ bir tarafı Sakallı Veli bağı ve bir tarafı karındaşı Halil Beşe bağı ve bir tarafı Bulgaroğlu Osman Beşe bağı ve bir tarafı tarîk-i âm ile mahdûd tahmînen beş dönüm kürûmî mülk biribirine muttasıl iki dut koca bağı kırk guruşa ve yine karye-i mezbûrede vâki‘ bir tarafı müvekkilim mezbûrun menzili ve bir tarafı Karaoğlu Ahmed Beşe veresesi bahçesi ve bir tarafı Güleş Mustafa’nın bahçesi bir tarafı Eskicioğlu İsmail tarlasıyla mahdûd tahmînen iki dönüm ayva ve muşmula eşcârlı mülk bahçesini yirmi guruşa ve yine altı vakıye bir kazgan altı guruşa ve yine iki guruşa iki aded tencere ve iki kapak ve dört aded sahan iki guruşa tarafeynden îcâb ve kabûlü [hâvî] şurût-ı müfsideden ârî bey‘-i bâtt-ı sahîh-i şer‘î ile müşteriyân-ı mezbûrûna bi-safkatin vâhidetin yüz otuz guruşa bey‘ u teslîm ve temlîk edüp onlar dahi ber-vech-i muharrer ale’l-iştirâki’s-seviy iştirâ ve tesellüm ve temellük ve kabz u kabûl eyleyüp semeni olan meblağ-ı mezkûr yüz otuz guruşun mütâlebesine müte‘allıka âmme-i da‘vâdan müvekkilim mezbûr Mehmed Beşe müşteriyân-ı mezbûrân Halil ve Habibe’nin zimmetini ibrâ ve iskāt edüp fîmâ-ba‘d mârrü’z-zikr iki kıt‘a bağda ve ve bir kıt‘a bahçede ve bir kazganda ve iki tencerede ve dört sahanda vechen mine’l-vücûh ve sebeben mine’l-esbâb kat‘â ve kātıbeten müvekkilim mezbûrun alâka ve medhali kalmayup müşteriyân-ı mezbûrânın ale’l-iştirâki’s-seviy mülk-i müşterâları olmuşdur keyfe mâ yeşâ’ân ve yahtârân mutasarrıf olsunlar dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 9 Muharrem sene [1]181 Şuhûdü’l-hâl: Mehmed Beşe b. Mustafa, İsmail Beşe b. Mehmed, Osman Efendi, Nalband Hüseyin Beşe, Nalband Veli, Nalband Halil, Hancı Süleyman Beşe, Berber Mustafa b. Hasan, Kürt Hüseyin Beşe, Nalband Veli.