Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 44 Hüküm no: 4 Orijinal metin no: [2a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf Dede’nin türbedarlığa tayini Ma‘rûz-ı dâ‘îleridir ki, Sâdır olan fermân-ı âlîlerine imtisâlen işbu arzuhâl ve hâmişinde mastûr kayd ve derkenâra nazar olundukda Midilli Gümrüğü Mukāta‘ası fâizinden almak üzere iki kıt‘a berât-ı âlîşân ile yevmî kırk sağ akçe vazîfe ile evlâd-ı Rasûl -aleyhi’s-selâmdan- Şerife hazretleri türbedârı olan Tarîkat-ı mevleviyye’den eş-Şeyh Ali fevt olmağla kaydı kaleminden derkenâr ve müteveffâ-yı mezbûr mahlûlünden bu dâ‘îlerine tevcîh ve yedime başka başka berât-ı âlîşân sadaka ve ihsân buyurulmak niyâz ve istirhâmında olduğu sâhib-i arzuhâl el-Hâc Yusuf Dede’nin işbu arzuhâli meâlinden müstefâd ve türbedârlık-ı mezkûr başka başka berât-ı âlîşân ile el-yevm eş-Şeyh Ali üzerinde olduğu kaydı derkenârından müstebân ve merkūm eş-Şeyh Ali’nin bilâ-veled fevti vâki‘ olduğu kazâ-i mezbûr ahâlîsinden olup Âsitâne-i aliyye’de müsâfiren sâkinûn Esad b. el-Hâc İsmail ve Şeyh Abdulkadir b. Hüseyin nâm mevsûku’l-kelim kimesnelerin alâ-tarîkı’ş-şehâde ihbârlarından nümâyân olmağın bu sûretde türbedârlık-ı mezkûr müteveffâ-yı mezbûr Şeyh Ali mahlûlünden sâhib-i arzuhâl mezbûr el-Hâc Yusuf Dede kullarına tevcîh ve yedine berât-ı âlîşân inâyet ve ihsân buyurulmak menût-ı re’y-i âlîleri idüğü huzûr-ı âlîlerine i‘lâm olundu. El-emru li-men-lehü’l-emr. Fî 13 B sene [12]51.