Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 45 Hüküm no: 5 Orijinal metin no: [2a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Todoros ile vefat eden kardeşinin çocukları Nikola, Mihal ve Mina arasındaki yol anlaşmazlığı Ma‘rûz-ı dâ‘îleridir ki, Sâdır olan fermân-ı âlîlerine imtisâlen hâlâ Isparta kazâsı nâibi es-Seyyid Mehmed Sadeddin Efendi’nin mührü mutâbık arzı ve hâmişinde mastûr derkenâra nazar olundukda medîne-i Isparta mahâllâtından Gani? mahallesi mütemekkinlerinden Todoros v. Nikola zimmî meclis-i şer‘de takrîr-i kelâm edip on iki sene mukaddem hâlik olan karındaşı Luka zimmî ile babalarından metrûk menzillerini beynlerinde taksîm ve hisselerine isâbet edeni ifrâz eylediklerinde hisse-i irsiyesine kalan menzil-i mezkûrun ifrâz olunan mülk yolundan karındaşı hâlik-i mersûmun oğulları Nikola ve Mihal ve Mina zimmîlerin babalarından mevrûs mülk menzillerinin yolu var iken benim mülk menzilimin yolundan iğmâz ve tesâmuhumla sinîn-i vefîreden beri mürûr etmişler ise de el-yevm mürûrların men‘ dâ‘iyesinde olduğumda otuz seneden mütecâviz mürûr etmelerimizle bundan böyle dahi mürûra musır olmalarıyla mesfûrûnun benim yolumdan mürûrlarını men‘ ve keff-i yedleri bâbında bir kıt‘a emr-i âlî ısdâr niyâz ve istirhâmında olduğu meâl-i arz-ı mezkûrdan müstefâd ve husûs-ı mezkûr için Dîvân-ı Hümâyûn tarafından emr-i âlî verilmediği kaydı derkenârından müstebân olmağla bu sûretde derûn-ı arz-ı mezkûrda mastûr mersûm Todoros v. Nikola zimmînin babası hâlik-i mersûm Nikola zimmîden müntakiller mülk menzil hissesinde kâin tarîk husûsuna dâir karındaşı hâlik-i mesfûr Luka zimmînin oğulları mersûm Nikola ve Mihal ve Mina zimmîler ile beynlerinde vukū‘ bulan tarîk-i mezkûr nizâ‘larında yine mersûm Todoros zimmînin iddi‘âsı şer‘an mesmû‘ olmağla ber-vech-i meşrûh tarafeyn mahâllinde bi’l-muvâcehe ba‘de tahakkuku’l-husûmet terâfu‘-i şer‘-i şerîf ve ihkāk-ı hak olunmak bâbında Isparta mütesellimiyle nâibine hitâben bir kıt‘a fermân-ı âlîşân ısdâr ve i‘tâsı menût-ı re’y-i âlîleri idüğü huzûr-ı âlîlerine i‘lâm olundu. El-emru li-veliyyi’l-emr. Fî 19 B sene [12]51