Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 46 Hüküm no: 6 Orijinal metin no: [2a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pavlos v. Yorgi’nin, Nikola’nın Yuvan’a sattığı menzil hissesinde şüf’a hakkı iddiası Ma‘rûz-ı dâ‘îleridir ki, Sâdır olan emr-i âlîye imtisâlen işbu arzuhâl ve hâmişinde mastûr derkenâra nazar olundukda Anadolu’da Niğde kasabasında kâin Ağa Mustafa mahallesinde mütemekkin sâhib-i arzuhâl Pavlos oğlu Yorgi zimmînin mütemekkin olduğu menzili ittisâlinde Marad oğlu Yuvan zimmînin menzili ve üst tarafında dahi Nikola zimmînin menzili olup mersûm Yorgi zimmînin ilm ü haberi olmaksızın mesfûr Nikola kendi menzilini mersûm Yuvan zimmîye bey‘ edip ol dahi iştirâ ve kabûl etmiş olmağla mesfûr Yorgi zimmî bi-hakkı’ş-şüf‘a bey‘ olunmuş olan menzil-i mezkûrdan şüf‘a tarîkiyle nısf menzil-i mezkûru taleb eyledikde vermekde mersûm Nikola muhâlefet etmiş olduğundan fürûht olunmuş olan menzil-i mezkûrdan bi-tarîkı’ş-şüf‘a nısfını alıverilmek husûsu bâbında mütesellim ve nâibine hitâben bir kıt‘a emr-i âlînin sudûru niyâzında olduğu meâl-i arzuhâlden müstebân olmağla bu sûretde sâhib-i arzuhâl olan mersûm Pavlos oğlu Yorgi zimmînin istid‘â eylediği menzilden şüf‘a ittihâzı menâzil-i mezkûre mülk olduğu tebeyyün eylediği takdîrde ve şerâit-i şüf‘aya dahi bi-tamâmihâ mahâllinde ri‘âyet eylemiş ise da‘vâsı mesmû‘ olacağı ve istid‘âsı mûcebince tarafeyn mahâllinde bi’l-muvâcehe ber-nehc-i şer‘î terâfu‘-i şer‘ ve ihkāk-ı hak olunmak bâbında Niğde mütesellimiyle nâibine hitâben bir kıt‘a fermân-ı âlîşân sudûru iktizâ eylediği huzûr-ı âlîlerine i‘lâm olundu. El-emru li-veliyyi’l-emr. Fî 7 C sene [1]251.