Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 46 Hüküm no: 7 Orijinal metin no: [2a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bursa’da Haremeyn Vakfından olan vakıf menzil ve arsanın istibdâli Ma‘rûz-ı dâ‘îleridir ki Sâdır olan fermân-ı âlîlerine imtisâlen mahrûse-i Bursa kazâsı nâibi Feyzi Efendizâde es-Seyyid Süleyman Efendi’nin mührü mutâbık arzı ve hâmişinde mastûr derkenâra nazar olundukda husûs-ı âti’l-beyânın mahalinde istimâ‘ ve ketb ü tahrîri için savb-ı şer‘-i enverden bi’l-iltimâs me’zûnen mürsel Kâtib el-Hâc Mehmed Nuri Efendi mimâr-ı hâssa kāimmakāmı hulefâsından es-Seyyid Mehmed Tahir Ağa ile nezâreti Evkāf-ı hümâyûn-ı mülûkâneye mülhak evkāfdan mahrûse-i Bursa hısnı dâhilinde merhûm Şeyh Paşa mahallesi Câmi‘-i şerîfi’nde bâ-berât-ı şerîf-i âlîşân kayyum olanlara tevliyet ve süknâsı meşrûta zikri âtî arsa üzerine varıp cerîde-i şer‘de mazbûtü’l-esâmî kimesneler muvâcehesinde akd-i meclis-i şer‘-i nebevî etdikde câmi‘-i şerîf-i mezkûrda bâ-berât-ı âlî kayyum olup arsa-i mezkûrenin tevliyet ve süknâsı bi’l-meşrûtiye mutasarrıf olan es-Seyyid İbrahim Efendi b. Musa meclis-i ma‘kūd-ı mezkûrda zikri câî bir bâb mülk menzile bâ-hüccet-i şer‘iyye mâlike ve mutasarrıfe olan zâtı ta‘rîf-i şer‘î ile mu‘arrefe Şerife Zeyni Hanım bt. Süleyman muvâcehesinde ikrâr-ı tâm ve takrîr-i kelâm edip işbu derûnunda akd-i meclis olunan etrâf-ı erba‘adan tarafeyni Abdülkerim Ağa veresesi mülk menzilleri ve Haremeyn Vakfı’ndan yine verese-i mezbûrenin diğer mülk arsası ve tarîk-i âm ile mahdûd bir ahır ve iki hâbiye-i mâ-i cârîyi müştemil bir bâb menzil arsası câmi‘-i şerîf-i mezkûrda kayyum olanlara tevliyet ve süknâsı meşrûta ve ol vechile benim dâhil-i havza-i tasarrufumda olup ve yine Nakkaş Ali mahallesinde vâki‘ etrâf-ı erba‘adan tarafeyni verese-i mezbûre ve Saraç Hüseyin menzilleri ve tarîk-i âm ile mahdûd iki beyt-i ulvî ve bir sofa ve bir ahır ve bâ-hâbiye-i mâ-i cârî ve bir helâyı müştemil bir bâb mülk menzil mezbûre Şerife Zeyni Hanım’ın bâ-hüccet-i şer‘iyye silk-i mülk-i sahîhinde olmağla ben mutasarrıf olduğum sâlifü’z-zikr vakıf menzil arsasını mârru’z-zikr mülk menzil ile istibdâl murâd edip mezbûre Zeyni Hanım dahi istibdâle tâlibe olmağla cânib-i şer‘den ber-minvâl-i muharrer istibdâli re’y olunmağın bi’l-mu‘âyene hâzırûn erbâb-ı vukūfdan lede’l-istihbâr istibdâli evlâ ve enfa‘ ise i‘lâm olunmak murâdımdır dedikde evvelâ vakıf olan menzil-i mezkûr arsasını mimâr-ı hâssa kāimmakāmı merkūm ve sâir hâzırûn-ı erbâb-ı vukūf ile misâha ve tahmîn olundukda terbî‘an iki yüz doksan zirâ‘ arsa ve köhne ebniyesi kıymeti ancak yedi yüz guruş olup sâniyen civârında mezbûre Zeyni Hanım’ın mahalle-i mezbûrede vâki‘ mülk olan menzil-i mezkûr üzerine varılıp kezâlik keşf ü misâha ve tahmîn olundukda terbî‘an iki yüz seksen zirâ‘ arsası ve terbî‘an yüz yetmiş yedi zirâ‘ cedîd ebniyesinin kāimen kıymeti bin beş yüz elli guruş olmağla ol vechile vakıf olan menzil-i mezkûrdan kıymet ve rağbet ve vüs‘at ve ücret cihetlerinden ekser ve evfer ve ezyed ve şerâit-i istibdâl mevcûde ve istibdâli cânib-i vakfa her vechile enfa‘ ve evlâ ve hayr-ı mahz olduğunu kāimmakām-ı mimâr-ı hâssa ve hâzırûn-ı erbâb-ı vukūf haber verdiğini kâtib-i merkūm mahâllinde ketb ü terkīm ve meclis-i şer‘a gelip inhâ ve tefhîm etmeğin mûcebiyle istibdâline izin ve ruhsat-ı hazret-i şâhâneyi hâvî bâlâsı tuğrâ-yı garrâ ile mu‘anven bir kıt‘a fermân-ı celîlü’ş-şân sudûrunu istid‘â-yı inâyet eyledikleri meâl-i arz-ı mezkûrdan müstefâd ve bu makūle mülk menzil vakıf olan menzilden kıymeten ve rağbeten ve ücreten ve mahallen ezyed ve evfer ve istibdâli vakfa evlâ ve enfa‘ olup şürût-ı istibdâl mevcûde bulunduğu sûretde istibdâli tecvîz eyleyen fukahâ-yı zevi’l-ibtihâcın kavilleri üzere mülk menzil vakıf ve vakıf olan menzil mülk ve vakıf evvelin şürûtu vakf-ı sânîde icrâ olunmak üzere istibdâl olunup tarafeyne hüccet verilmek için bâ-irâde-i aliyye Dîvân-ı hümâyûn tarafından emr-i şerîf yazılageldiği meâl-i derkenârdan müstebân olmağla bu sûretde işbu derûn-ı arzda tasrîh olunduğu üzere şerâit-i şer‘iyyesine ri‘âyet olunmuş olduğundan istibdâli tecvîz eyleyen fukahâ-yı zevi’l-ibtihâcın kavilleri üzere mülk olan menzil mârru’z-zikr vakıf ve vakıf olan menzil sâbıku’l-beyân mülk ve vakf-ı evvelin şürûtu vakf-ı sânîde icrâ olunmak üzere istibdâl olunmasına izn-i hümâyûn-ı şâhâneyi mutazammın emr-i âlî i‘tâsı muvâfık-ı şer‘-i şerîf idüğü huzûr-ı âlîlerine i‘lâm olundu. El-emru li-hazreti veliyyi’l-emr. Fî 21 Ş sene [1]251