Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 90 Hüküm no: 91 Orijinal metin no: [19a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkçü Yorgaki ve kardeşi Mandoya’nın kendilerine miras yoluyla intikal eden menzili Panayot’a sattıkları Mahrûse-i Galata’da vâki‘ Sultân Bâyezid mahâllesinde mütemekkin Kürkçü Yorgaki ve Mandoya? veledey Kostandi nâm karındaşlar taraflarından ber-vech-i âti’l-beyanda vekîlleri olduğu merkūm Yorgaki ve Kabari? ve mesfûre Mandoya’nın oğlu olup zâtı bi’l-ma‘rifeti’ş-şer‘iye ârifân Manziri? v. Zafir ve Mirasyedi Yorgo v. Manol zimmîler şehâdetleriyle sâbitü’l-vekâleleri Lefter v. Anderya ve Dişraki v. Mestermori? meclis-i şer‘de bağcı tâifesinden işbu râfi‘ü’r-rakīm Panayot v. Tarandafil zimmî muvâcehesinde her biri bi’l-vekâle ikrâr ve takrîr-i kelâm edüp akd-i âti’z-zikrin sudûruna değin müvekkilân-ı merkūmânın li-ebeveyn er karındaşları olup medîne-i Üsküdar’a muzâfe Adalar nâhiyesine tâbi‘ Heybeli Adası’nda vâki‘ bir tarafı Aci Yanaki mülkü ve bir tarafı diğer karındaşları Enciro? zimmî menzili ve kayıkhânesi ve bir tarafı manastıra ve tarîk-i âmma bir tarafı tarîk-i âm [ve bir tarafı] leb-i deryâ ile mahdûd fevkānî iki bâb oda ve iki sofa ve dehliz ve bir matbâh ve kenîf ve tahtında avlu ve odaların hizâsında manastıra çıkar tarîk-i âmma müntehî eşcâr-ı müsmire ve gayrı müsmire[yi] hâvî üç kıt‘a bi’r-i mâyı müştemil mülk menzil-i mevrûslarını bi-cümleti’t-tevâbi‘ [19b] ve’l-levâhık ve kâffeti’l-hukūk [ve’l-merâfık] tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile müşterî-i merkūma yedi yüz elli guruşa bey‘ u teslîm ve temlîk eylediklerinde ol dahi ber-vech-i muharrer iştirâ ve tesellüm ve temellük ve kabz u kabûl eyledikden sonra semeni olan meblağ-ı mezkûr yedi yüz elli guruşu müşterî-i merkūm yedinden müvekkilân-ı mezbûrân bi-kadri’l-hısas tamâmen ahz ü kabz eyleyüp fîmâ-ba‘d zikri mürûr eden menzilde vechen mine’l-vücûh ve sebeben mine’l-esbâb müvekkilân-ı mezbûrân Yorgaki ve Mandoya’nın kat‘â ve kātıbeten alâka ve medhalleri kalmayup müşterî-i merkūm Panayot’un mülk-i müşterâsı ve hakk-ı sırfıdır keyfe mâ yeşâ ve yehtâr mutasarrıf olsun dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 15 Muharrem sene [1]181 Şuhûdü’l-hâl: Molla İbrahim, Ahmed Efendi, Yahya Beşe b. Eyüb, Ahmed Ağa, es-Seyyid Ahmed Ağa, el-Hâc Mahmud Ağa. Kurtiş ve Ananosti v. Yorgi, Papa İsayi v. Nikola, Berber Sole v. Siyot Yorgaki v. Yanako, Aci Hıristo v. Tanaş, Tanaş, Dimitri v. Serkiz.