Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 48 Hüküm no: 8 Orijinal metin no: [2b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Numan b. Ali’nin Oltu’da İslam Kethüda Vakfı’na ait satmış olduğu arazinin geri alınması Ma‘rûz-ı dâ‘îleridir ki, Sâdır olan emr-i âlîlerine imtisâlen işbu arzuhâl ve hâmişinde mastûr derkenâra nazar olundukda Oltu kazâsında İslam Kethüdâ nâm kimesnenin ma‘lûmü’l-hudûd menâzil ve hadîka ve sâir arazi-i mevkūfesinin gallesi neslen ba‘de neslin evlâd-ı zükûruna, ba‘de’l-inkırâz batnen ba‘de batnin ale’t-tesâvi evlâd-ı inâsına, ba‘de’l-inkırâz asabe-i nesebiyesine, ba‘dehu zevi’l-erhâmına, ba‘dehu Medîne-i Münevvere fukarâsına şart etmiş olduğu vakfiye-i ma‘mulün-bihâsında mastûr ve ol vechile evlâdı mutasarrıflar iken yine evlâd-ı zükûrundan Numan b. Ali nâm kimesne arazi-i vakf-ı mezkûrdan bir tarafı bahçe harkı ve üst tarafı tarîk-i âm ve diğer tarafı Zerdenis sınırı ve taraf-ı râbi‘i Şıracı yolunun altı ile mahdûd olan mahâlli merkūm Numan hilâf-ı şer‘-i şerîf Çamoceris? ahâlîsine bey‘ ve teslîm etmekle vakf-ı mezkûrdan olan mahâll-i mezkûru ahâlî-i mezbûrdan istirdâd ve yedlerinden ihrâç olunması bâbında bir kıt‘a fermân-ı âlîşân ısdârı istid‘âsında olduğu meâl-i arzuhâlden müstefâd ve nizâm-ı mezkûr zımnında târîh-i atîk ile emr-i âlî sudûr buyurulmuş olduğu meâl-i derkenârdan müstebân olmağla bu sûretde ber-vech-i muharrer evlâd-ı vâkıfdan olan mezbûr sâhib-i arzuhâl Osman’ın istid‘âsı vâki‘ olduğu takdîrde mezbûr Numan’ın arazi-i vakf-ı mezkûrda vukū‘ bulan bey‘inin butlânına binâen ber-muktezâ-yı şer‘-i kavîm ve vakfiye-i ma‘mulün-bihâ mûcebince merkūm Numan’ın vakfiyetinden ihrâç zu‘muyla ahâlî-i mezbûra bey‘ etmiş olduğu arazi-i vakf-ı mârrü’l-beyânın istirdâdıyla vâki‘ olan ta‘addîsi men‘ ü def‘ olunması bâbında Çıldır vâlisi ile Oltu kazâsı hâkimine hitâben bir kıt‘a emr-i âlî ısdârı menût-ı re’y-i âlîleri idüğü huzûr-ı âlîlerine i‘lâm olundu. El-emru li-men-lehü’l-emr. Fî 19 L sene [1]251