Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 48 Hüküm no: 9 Orijinal metin no: [2b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hâce Şeref bt. Seyyid Mustafa Vakfından olan menzil hissesinin bakkal dükkânı ile istibdâli Ma‘rûz-ı dâ‘îleridir ki, Sâdır olan fermân-ı âlîlerine imtisâlen hâlâ Halebü’ş-şehbâ kādısı mevâlî-i kirâmdan Uryânîzâde Mehmed Said Efendi’nin mührü mutâbık arzı ve hâmişinde mastûr derkenâra nazar olundukda medîne-i Halebü’ş-şehbâ’da vâki‘ ashâb-ı hayrâtdan Câbirîzâde kerîmesi demekle arîfe el-Hâce Şeref bt. es-Seyyid Mustafa nâm sâhibetü’l-hayr evkāfının evlâdiyet ve meşrûtiyet üzere mütevellîsi olan Câbirîzâde es-Seyyid Mehmed Talib Efendi b. es-Seyyid Yusuf nâm kimesne meclis-i şer‘-i şerîf-i enverde ikrâr-ı tâm ve ta‘bîr ani’l-merâm edip mütevellîsi olduğum vakf-ı mezbûr müstagallâtından olup galle-i hâsılasından ba‘de’l-masârıf senevî yirmi dört guruş fazlası olan medîne-i mezbûrede Kastelü’l-haramî? mahallesinde vâki‘ Zehir sokağında kâin yirmi dört sehmle mu‘teber ma‘lûmetü’l-hudûd ve’l-müştemilât bir bâb menzilden iki sehm ve beş südüs an-sehm-i şâyi‘a hissesini menzil-i mezbûr mürûr-ı eyyâm ile müşrif-i harâb ve mâil-i türâb olup ta‘mîri için vakıfda fazla galle mevcûd olmamağla istibdâline tâlib ve râgıb olan Gürünlü kızı demekle arîf Tamara bt. İgobcan Nasrâniye silk-i mülkünde münselik olup galle-i hâsılasından ba‘de’l-masârıf senevî kırk sekiz guruş fazlası olan medîne-i mezbûrede Bâbünnasr hâricinde vâki‘ Tabla Çarşısı’nda kâin ma‘lûmü’l-hudûd ve’l-müştemilât bir bâb bakkāl dükkânı ile istibdâl olunmak murâdımdır deyü iltimâs eylediğine mebnî taraf-ı şer‘-i enverden ta‘yîn olunan ümenâ-i şer‘le mimâr-ı hâssa halîfesi ma‘rifetleriyle keşif ve mu‘âyene olundukda mezbûr mülk dükkân merkūm vakıf hissesinden ücreten ekser ve kıymeten evfer ve binâen ahkem ve mahallen ergab ve min-külli’l-vücûh istibdâli cânib-i vakfa evlâ ve enfa‘ olduğunu lede’t-tahkīk ehl-i hibre ve erbâb-ı vukūf bî-garaz mazbûtü’l-esâmî ve mevsûku’l-kelim ahrâr-ı ricâl-i Müslimînden kimesneler ihbârlarıyla dahi zâhir ve âşikâr olmağın merkūm vakıf hisse-i mezbûr mârru’z-zikr mülk dükkân ile istibdâl olunmak bâbında izn-i hümâyûnu hâvî bir kıt‘a emr-i âlîşân istid‘â eylediği meâl-i arzdan müstefâd ve bu makūle mülk akār vakıf olan akārdan kıymeten ve rağbeten ve ücreten ve mahallen ezyed ve evfer ve istibdâli cânib-i vakfa evlâ ve enfa‘ olup şürût-ı istibdâl mevcûde olduğu sûretde fukahâ-yı zevi’l-ibtihâcın kavilleri üzere mülk [olan] akār vakıf ve vakıf olan akār mülk ve vakf-ı evvelin şürûtu vakf-ı sânîde icrâ olunmak üzere tarafeyne hüccet-i şer‘iyye verilmek için bâ-irâde-i aliyye Dîvân-ı hümâyûn tarafından emr-i şerîf yazılageldiği derkenârdan müstebân olup ancak zikr olunan vakıf menzil ile sâlifü’l-beyân mülk dükkân mahallerinde hudûd-ı erba‘aları ve arsa ve ebniyelerinin mikdâr-ı zirâ‘ ve kıymetleri vakıf olan menzil-i mezkûr kadîmden ehl-i zimmet kefere menzili olduğu derûn-ı arzda tasrîh ve beyân olunmadığından ol vechile şerâit-i istibdâl mevcûde olduğu ma‘lûm olamamağla bu sûretde mârru’z-zikr vakıf menzil ile sâbıku’l-beyân mülk dükkân her birinin hudûd-ı erba‘aları ve arsa ve ebniyelerinin başka başka lede’l-misâha ve’t-tahmîn mikdâr ve kıymetleri tasrîh ve beyân olunarak mülk dükkân-ı mezbûr vakıf menzil-i mezkûrdan vüs‘at ve rey‘ ve kıymet ve rağbet cihetlerinden evfer ve ezyed ve sâbıku’z-zikr vakıf menzil kadîmden ehl-i zimmet kefere menzili olup ve istibdâli cânib-i vakfa enfa‘ ve evlâ ise istibdâl olmasına izn-i hümâyûn-ı şâhâneyi mutazammın emr-i âlî i‘tâsı muvâfık-ı şer‘-i şerîf idüğü huzûr-ı âlîlerine i‘lâm olundu. Fî 13 M sene [1]252.