Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 51 Hüküm no: 11 Orijinal metin no: [2b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Menzil hissesi üzerinde şüf’a hakkı iddiası Ma‘rûz-ı dâ‘îleridir ki, Sâdır olan fermân-ı âlîlerine imtisâlen işbu arzuhâl ve hâmişinde mastûr derkenâra nazar olundukda medîne-i Kayseriye’de Eslem Paşa mahallesinde bir bâb mülk menzilin beş hisse i‘tibârıyla bir hissesine mutasarrıf olup hissedârım mersûmdan hisselerini almağa tâlib iken ecânibden ve kasaba-i mezbûre mütemekkinlerinden Boyacı Danyel zimmî fuzûlen hissedârım hisselerini habersiz almış ve şimdi hissem ziyâdedir diyerek bütün bütün zabt edip gadr-ı küllî olmağla şefî‘ olduğuma mebnî hisse-i merkūme şer‘an alıverilmesi için Kayseriye mütesellimiyle hâkimine hitâben bir kıt‘a emr-i âlî i‘tâ buyurulması bâbında sâhibe-i arzuhâl Akali Nasrâniyenin istid‘â-yı inâyet eylediği meâl-i arzuhâlinden müstefâd ve huzûr-ı mezbûr menzil hissesi nizâ‘ına dâir şer‘le görülecek mevâddan olduğu derkenârda mukayyed mefhûm-ı muktezâdan müstebân olmağla bu sûretde mersûme Akali Nasrâniyenin taleb ve iddi‘â eylediği mülk menzil hissesi vâki‘ olduğu takdîrde hasm ittihâz eylediği mersûm Danyel zimmî ile mahâllinde terâfu‘-i şer‘-i şerîf olunarak ihkāk olunması[nı] âmir Kayseriye mütesellimiyle hâkimine hitâben bir kıt‘a emr-i âlîşân ısdâr buyurulması menût-ı re’y-i âlîleri idüğü huzûr-ı âlîlerine i‘lâm olundu. Fî 19 M sene [1]252.