Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 53 Hüküm no: 14 Orijinal metin no: [3a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa’nın Zile’de inşa eylediği cami vakfından olan menzilin mülk menzil ile istibdâli Ma‘rûz-ı dâ‘îleridir ki, Sâdır olan fermân-ı âlîlerine imtisâlen hâlâ medîne-i Zile Nâibi Şeyhzâde es-Seyyid Mustafa Necib Efendi’nin mührü mutâbık arzı ve hâmişinde mastûr derkenâra nazar olundukda medîne-i Tokad voyvodası ashâb-ı hayrâtdan müteveffâ es-Seyyid Ahmed Ağa b. es-Seyyid Osman Ağa nâm vâkıfın medîne-i Zile’de binâ eylediği câmi‘-i şerîfin evkāfı musakkafâtından medîne-i Tokad’da Hoca Ahmed Efendi mahallesinde vâki‘ hudûdu ma‘lûm vakıf menzilin bâ-berât-ı âlîşân mütevellîsi olan vâkıf-ı mûmâ-ileyhin sulbî kebîr oğlu es-Seyyid Abdullah Ağa meclis-i şer‘-i şerîfde şöyle takrîr-i kelâm eder ki bâlâda mezkûr medîne-i Tokad’da vâki‘ vakıf menzil-i mezkûrdan medîne-i mezbûrede Kethüdâ mahallesinde vâki‘ ma‘lûmü’l-hudûd hâriciye ve dâhiliye mülk menzilim sâlifü’z-zikr vakıf menzilden arsaten ve cevdeten ve rağbeten ve kıymeten ekser ve evfer olup vakıf menzil-i mezkûrun icâresine dahi tâlib ve râgıb olmadığından istibdâli cânib-i vakfa min-külli’l-vücûh enfa‘ ve evlâ olmağın istibdâli murâdımdır dedikde mülk menzil-i mezkûr arsaten ve cevdeten ve rağbeten ve kıymeten sâlifü’z-zikr vakıf menzilden ekser ve evfer olduğunu mu‘âyene ederek vukūfu olan Müfti-yi esbak Lütfullah Efendi Vakfı ve Müfti-yi sâbık es-Seyyid Ahmed Efendi ve el-Hâc Hayreddin Efendizâde es-Seyyid Ali Efendi ve Hacı Hasan Ağa ve Mehmed Ağa ve sâir bî-garaz kimesneler meclis-i şer‘a gelip vukū‘u üzere ihbâr eylediklerinde istdibdâli vakf-ı mezkûra her vechile enfa‘ ve evlâ olduğu lede’ş-şer‘ zâhir olmağın istibdâl olunmak için izn-i hümâyûnu mutazammın bir kıt‘a emr-i şerîf-i celîlü’ş-şân sudûru istid‘âsında olduğu meâl-i arz-ı mezkûrdan müstefâd ve bu makūle mülk menzil vakıf olan menzilden kıymeten ve rağbeten ve ücreten ve mahallen ezyed ve evfer ve istibdâli cânib-i vakfa enfa‘ ve evlâ olup şürût-ı istibdâl mevcûde olduğu sûretde istibdâli tecvîz eyleyen fukahâ-yı zevi’l-ibtihâcın kavilleri üzere mülk menzil vakıf ve vakıf olan menzil mülk olmak ve vakf-ı evvelin şürûtu vakf-ı sânîde icrâ olunmak üzere istibdâl olunup tarafeyne hüccet verilmek için bâ-irâde-i aliyye Dîvân-ı hümâyûn tarafından emr-i şerîf yazılageldiği derkenârdan müstebân olmağla ancak zikr olunan vakıf menzil ile sâlifü’l-beyân mülk menzilin mahallerinde hudûd-ı erba‘aları ve arsa ve ebniyelerinin mikdâr ve zirâ‘ ve kıymetleri ve rey‘ ve ücretleri derûn-ı arz-ı mezkûrda tasrîh ve beyân olunmadığından ol vechile şerâit-i istibdâl mevcûde olduğu ma‘lûm olamamağla bu sûretde mârru’z-zikr vakıf menzil ile sâlifü’l-beyân mülk her birinin hudûd-ı erba‘aları ve arsa ve ebniyelerinin başka başka lede’l-misâha ve’t-tahmîn mikdâr-ı zirâ‘ ve kıymetleri ve rey‘ ve ücretleri tasrîh ve beyân olunarak mülk menzil-i mezbûr vakıf menzil-i mezkûrdan vüs‘at ve rey‘ ve kıymet ve rağbet cihetlerinden evfer ve ezyed ve istibdâli cânib-i vakfa enfa‘ ve evlâ ise istibdâl olunmasına izn-i hümâyûn-ı şâhâneyi mutazammın emr-i âlî i‘tâsı muvâfık-ı şer‘-i şerîf idüğü huzûr-ı âlîlerine i‘lâm olundu. Fî 5 C sene [1]252.