Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 55 Hüküm no: 16 Orijinal metin no: [3b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun’un kocasından intikal eden tereke hissesini diğer varis Ahmed Nurullah’a satması Ma‘rûz-ı dâ‘îleridir ki, Sâdır olan fermân-ı âlîlerine imtisâlen hâlâ Kapıdağı Nâibi es-Seyyid Mustafa Nuri Efendi’nin mührü mutâbık arzı hâmişinde mastûr emr-i âlî sûretiyle bâlâsında mukayyed şerhle derkenâra nazar olundukda mahrûse-i Galata’ya muzâfe Kapıdağı nâhiyesine tâbi‘ Bandırma kasabasında bundan akdem vefât eden Şerif Ağazâde es-Seyyid Salih İzzet Bey b. Lütfullah nâm kimesnenin verâseti zevce-i metrûkesi Emine bt. Abdullah ile li-ebeveyn er karındaşı Mehmed Bey’in sagīr oğlu Ahmed Nurullah nâm kimesnelere münhasıra olup zevce-i mezbûre Emine Hatun meclis-i şer‘de sagīr-i mezbûrun vâlidesi ve vasîsi olan Emine bt. Receb nâm hatun muvâcehesinde şöyle ikrâr ve takrîr-i kelâm edip zevcim müteveffâ-yı mezbûr İzzet Bey’in urûz ve akār olan tereke-i mevcûdesinden hisse-i irsiyeme intikāl eden rub‘ hisse-i şâyi‘amı tarafeynden îcâb ve kabûlü hâvî bey‘-i sahîh-i şer‘î ile yalnız yirmi altı bin ikiyüz doksan sekiz guruş semen-i misline vasiyye-i mezbûre Emine Hatun’a bey‘ ve temlîk edip mezbûre Emine dahi iştirâ ve temellük eyledikden sonra semen-i misilleri olan meblağ-ı mezkûru vasiyye-i mezbûre Emine Hatun yedinden tamâmen ahz u kabz eyleyip fîmâ-ba‘d akār ve emlâk-ı mezkûrede olan rub‘ hisse-i şâyi‘a-i irsiyeme dâir âmme-i de‘âvî ve kâffe-i muhâsamâtdan mezbûre Emine Hatun’un zimmetini ibrâ ve iskāt eyledim dedikde gıbbe’t-tasdîk ve’l-kabûl te’kîdini hâvî bir kıt‘a emr-i âlîşânın ısdârı niyâzında olup meâl-i arz-ı mezkûrdan müstefâd ve müteveffâ-yı mezbûr İzzet Bey’in zevce-i metrûkesi mezbûre Emine Hatun’un ber-vech-i meşrûh rub‘ hisse-i irsiyesini tereke-i müteveffâ-yı mezbûra vâzı‘atü’l-yed olan vasiyye-i mezbûre Emine bt. Receb nâm hatundan taleb ve iddi‘âsı husûsu için iki yüz elli bir senesi Şa‘bânı’nda ısdâr etdirmiş olduğu bir kıt‘a fermân-ı âlîşân mahâllinde lede’l-vürûd ve’t-terâfu‘ zevci mezbûr İzzet Bey’den müntakil rub‘ hisse-i irsiyesini tamâmen ve kâmilen ahz u kabz edip mîrâsa ve sâir hukūka müte‘allika bir nesneleri kalmayıp birbirlerinin zimmetlerini ibrâ-i âm ile ibrâ ve her biri âharın ibrâsını kabûl eyledikleri Bandırma nâibinin vârid olan i‘lâmı mazmûnu târîh-i mezkûrda verilen emr-i şerîfin kaydı bâlâsına şerh verilen mazmûn-ı i‘lâmdan nümâyân olmağla bu sûretde mezbûre Emine bt. Abdullah Hatun’un ber-vech-i meşrûh zevci müteveffâ-yı mezbûr İzzet Bey’in tereke-i mevcûdesinde olan rub‘ hisse-i şâyi‘asını tereke-i mezbûra vâzı‘atü’l-yed olan vasiye-i mezbûre Emine bt. Receb nâm hatuna bey‘ ile rub‘ hisse-i irsiyesine dâir âmme-i de‘âvîden vasiyye-i mezbûre Emine bt. Receb nâm hatunun zimmetini ibrâ-i âm ile ibrâ eylediği vâkı‘a mutâbık olduğu takdîrce şer‘-i şerîfe muvâfık idüğü huzûr-ı âlîlerine i‘lâm olundu. Fî 23 C sene [12]52.